TDYuUda 3 yillik maxsus dastur va huquq fanidan sertifikat joriy etiladi

Farmonga ko‘ra, 2026-2027 o‘quv yilidan quyidagi yangiliklar amalga oshiriladi:

Toshkent davlat yuridik universitetiga Universitet huzuridagi akademik litsey, yuridik texnikum bitiruvchilari hamda oliy ma’lumotga ega shaxslar uchun ular tanloviga ko‘ra kirish mumkin bo‘lgan bakalavr yo‘nalishlari bo‘yicha kadrlar tayyorlashning maxsus 3 yillik ta’lim dasturi joriy etiladi;
Qashqadaryo yuridik texnikumi negizida Toshkent davlat yuridik universiteti huzuridagi akademik litsey tashkil etiladi.

Shuningdek, 2026-2027 o‘quv yilidan:

• “Yurisprudensiya” hamda “Davlat va jamiyat boshqaruvi” ta’lim yo‘nalishida bakalavr darajasiga ega shaxslarga qayta tayyorlov kurslaridan o‘tmasdan umumiy o‘rta ta’lim maktablarida “Davlat va huquq asoslari” fani bo‘yicha dars berishga ruxsat etiladi;
• huquq fanidan bilish darajasini baholash bo‘yicha test sinovi tashkil etiladi va uning natijalari asosida davlat namunasidagi sertifikat berish tartibi joriy etiladi.

Bundan tashqari, 2026 yil 1 martdan Universitetda “Yurisprudensiya” bakalavriat ta’lim yo‘nalishidan boshqa turdosh ta’lim yo‘nalishlari bitiruvchilari uchun 2 yillik magistratura mutaxassisligi joriy qilinadi.

Ushbu o‘zgarishlar yuridik ta’lim tizimini modernizatsiya qilish, malakali huquqshunos kadrlar tayyorlash, shuningdek, umumiy o‘rta ta’lim tizimida huquqiy madaniyat va huquqiy ta’lim sifatiga bo‘lgan talablarni oshirishga qaratilgani ta’kidlanmoqda.