Muhokamaga qo‘yilgan Vazirlar Mahkamasi qarori loyihasida ta’lim sohasiga oid bir qator hukumat qarorlariga o‘zgartish va qo‘shimchalar kiritish nazarda tutilgan.
Xususan, 2021 yil 19 maydagi «Xorijiy tillarni o‘rganishni ommalashtirishni samarali tashkil etish chora-tadbirlari to‘g‘risida»gi 312-son qarorga yangi norma kiritish taklif qilinmoqda. Unga ko‘ra, talab etiladigan tegishli xorijiy til sertifikatiga ega bo‘lmagan xodimlar bilan tuzilgan mehnat shartnomasi mehnat qonunchiligida belgilangan tartibda bekor qilinadi.
Shuningdek, loyihada gematologiya, onkologiya, klinik immunologiya hamda boshqa uzoq muddatli davolanishda bo‘lgan bolalar uchun tashkil etilgan «Mehrli maktab»lar faoliyatiga oid bir qator o‘zgartishlar ham nazarda tutilgan. Jumladan, muassasaning namunaviy shtatlar jadvalini tasdiqlash, ayrim lavozimlarni qayta belgilash, xodimlarning mehnatga haq to‘lash tartibiga aniqlik kiritish taklif etilmoqda.
Bundan tashqari, Maktabgacha va maktab ta’limi vazirining jamg‘armasi mablag‘larini to‘lash tartibi ham qayta ko‘rib chiqilib, har oylik ustamalar va bir martalik mukofotlarni to‘lash muddatlarini belgilash, shuningdek, «Mehrli maktab»lar faoliyatini tashkil etishga oid ayrim normalarni takomillashtirish rejalashtirilgan.
Loyiha jamoatchilik muhokamasi uchun e’lon qilingan bo‘lib, qabul qilingan taqdirda mazkur o‘zgartishlar tegishli hukumat qarorlariga tatbiq etiladi.
