Toshkentda ilk bor Markaziy Osiyo olimalari forumi o‘tkazildi

Toshkentda ilk bor o‘tkazilgan SheScience 2025 Markaziy Osiyo olimalari forumi mintaqadagi ilmiy hamkorlikni yangi bosqichga ko‘tarish, ilm-fanda ayollarning rolini kuchaytirish va innovatsion ekotizimlarni rivojlantirishga qaratildi.

Forumning asosiy natijasi sifatida qo‘shma bayonot qabul qilindi. Unda:

Markaziy Osiyo mamlakatlarining ilmiy va innovatsion ekotizimlarini integratsiyalash;
ilm-fan sohasida olima ayollar ishtirokini kengaytirish;
turli yo‘nalishlarda qo‘shma tadqiqotlarni rivojlantirish kabi yo‘nalishlar belgilab berildi.

Qo‘shma bayonotda kelajakdagi hamkorlikning beshta asosiy yo‘nalishi nazarda tutilgan bo‘lib, ular mintaqaning umumiy muammolarini samarali hal qilishga qaratilgan barqaror ilmiy ekotizimlarni shakllantirishga xizmat qiladi. Hujjat, shuningdek, forumni har yili Markaziy Osiyo mamlakatlarida navbatma-navbat o‘tkazish uchun asos yaratadi.

Forum ishtirokchilari ekologik xavflar, raqamli transformatsiya va sun’iy intellektni joriy etish bilan bog‘liq global muammolar sharoitida davlatlar o‘rtasida tizimli hamkorlik va ilmiy muloqotni kuchaytirish zarurligini qayd etdilar.

“SheScience 2025: mintaqaviy taraqqiyotni ilmiy va innovatsion ekotizimlar orqali qo‘llab-quvvatlash” forumida Qozog‘iston, Qirg‘iziston, Tojikiston, Turkmaniston, O‘zbekiston hamda Ozarboyjondan 60 dan ortiq olima va tadqiqotchi ayollar ishtirok etdi.

Tadbir doirasida yosh olimalarni qo‘llab-quvvatlash, ayollarni innovatsiyalar, texnologiyalar va ilm-fan sohasidagi yetakchi rolini oshirish, shuningdek, qo‘shma loyihalar va grant dasturlarini amalga oshirish masalalari muhokama qilindi.