O‘zbekiston tarixida ilk bor ayol karatechi jahon chempioniga aylandi

O‘zbekistonlik Gulshan Alimardonova 27-30 noyabr kunlari Misrning Qohira shahrida karate bo‘yicha bo‘lib o‘tgan jahon chempionatida -50 kg vazn toifasida oltin medalni qo‘lga kiritdi.

U finalda malayziyalik Shahmalarani Chandranni 6:1 hisobida mag‘lub etdi.

Sport vazirligi xabarida bu g‘alaba «tarixiy yutuq» deb atalgan va Gulshan Alimardonova jahon chempioni bo‘lgan ilk o‘zbekistonlik ayol karatechiga aylangani qayd etilgan.

Shu paytga qadar ushbu sport turi bo‘yicha jahon chempionatlarida O‘zbekistondan faqat Dastonbek Otabolayev oltin medalini qo‘lga kiritgan edi.

Alimardanova noyabr oyida Ar-Riyodda bo‘lib o‘tgan Islom birdamlik o‘yinlarida eronlik raqibiga yutqazib, kumush medal olgandi. Oktyabr oyida esa Ozarboyjonda III MDH mamlakatlari o‘yinlarida oltin medalga sazovor bo‘lgan.

Xalqaro karate federatsiyasi reytingida (WKF) u 300 dan ortiq sportchi orasida 1737.5 ochko bilan 15-o‘rinda qayd etilgan.

Uning hisobida O‘zbekiston va Xitoyda o‘tkazilgan qit’a birinchiliklarida qo‘lga kiritilgan ikkita oltin ham bor. U Fujayradagi yoshlar ligasi turnirida bitta bronza medalni qo‘lga kiritib, 24-o‘rinni egallagandi. Uning Malayziyadan bo‘lgan raqibi 11-o‘rinda joylashgandi.

19 yoshli sportchi butun faoliyati davomida 37 jang o‘tkazgan, g‘alabalar ulushi 78,38 foizni tashkil etadi.

Ma’lumot uchun, WKF reytingida birinchi o‘rinni qozog‘istonlik Moldir Jangbirbay egallab turibdi. Kuchli uchlikni Jazoir va Italiya vakillari to‘ldirgan.