Tarixda birinchi marta XKSga bir vaqtning o‘zida 8 ta kosmik kema ulandi

Xalqaro kosmik stansiya (XKS) tarixda birinchi marta kosmik kemalar bilan to‘liq band bo‘ldi. NASA vakillari XKS hozirgi konfiguratsiyasidagi barcha sakkizta ulanish nuqtasi ishlatilayotganini tasdiqladi - bunday holat hali bo‘lmagan.

Stansiya shunchalik band bo‘lib qoldiki, yaqinda NASA Cygnus yuk kemasini vaqtincha chetga surishga majbur bo‘ldi. Bu NASA astronavti Kris Uilyams va «Roskosmos» kosmonavtlari Sergey Kud-Sverchkov va Sergey Mikayevni orbitaga olib chiqqan «Soyuz MS-28» kemasi uchun joy bo‘shatish maqsadida amalga oshirildi.

Ular kelishidan oldin NASA Hyustondagi parvozlarni boshqarish markazi Canadarm2 robot qo‘li yordamida Cygnus yuk kemasini ehtiyotkorlik bilan chetga surdi. Bunday manyovrlar kamdan-kam uchraydi, lekin boshqa iloji yo‘q edi.

Stansiyada Rossiyaning «Prichal» moduliga ulangan «Soyuz MS-27» kemasi ham bor. Biroq u tez orada, 8 dekabr kuni Yerga qaytadi. Uning bortida NASA astronavti Jonni Kim va «Roskosmos» kosmonavtlari Sergey Rijikov va Aleksey Zubritskiy qaytadi. Qo‘nish Qozog‘istonda amalga oshiriladi.

Qolgan beshta kema - Rossiyaning «Progress M-92» va «Progress M-93» yuk kemalari bo‘lib, ular «Poisk» va «Zvezda» modullari yonida, Yaponiyaning HTV-X1 kemasi «Garmoniya» moduli porti yonida, shuningdek, SpaceX kompaniyasining ikkita Dragon kapsulasi ham bor.

XKS resursi asta-sekin tugab bormoqda. Stansiya faoliyatini to‘xtatishning boshlanishi 2027 yilga mo‘ljallangan bo‘lib, taxminan 2030 yilgacha davom etadi. Shundan so‘ng, u orbitadan chiqariladi va Tinch okeaniga cho‘ktiriladi. Ungacha yangi orbital stansiyalar paydo bo‘ladi.