Uning ta’kidlashicha, chempionat yakunlangan bo‘lsa-da, futbol boshqaruviga oid jiddiy muammolar saqlanib qolmoqda.
«Bayram bugun kechqurun yakunlanadi. Ammo savollar qoladi. Navbatdagi inqiroz allaqachon boshlangan. Uning ikki nomi bor - pul va hokimiyat», - dedi Berse.
FIFAga bir nechta yo‘nalish bo‘yicha e’tirozlar bildirildi
Alen Berse FIFAni siyosiy ta’sirlarga moyillik, irqiy mojarolar bilan bog‘liq bahslar hamda ADI Predicstreet bukmekerlik kompaniyasi bilan hamkorlik qilgani uchun tanqid qildi. Uning fikricha, bunday hamkorlik sportda firibgarlik xavfini kuchaytirishi mumkin.
Yevropa kengashi va FIFA o‘rtasida 2018 yilda o‘zaro anglashuv memorandumi imzolangan bo‘lib, unga muvofiq federatsiya inson huquqlarini himoya qilish, shaffof boshqaruv va yaxshi korporativ boshqaruv tamoyillariga amal qilish majburiyatini olgan.
Bersening fikricha, Shimoliy Amerikada bo‘lib o‘tgan 2026 yilgi jahon chempionati davomida yuzaga kelgan voqealar mazkur kelishuvni qayta ko‘rib chiqish zarurligini ko‘rsatdi. Shu munosabat bilan u 2030 yilgi mundialgacha yangi ramkaviy kelishuv bo‘yicha muzokaralar boshlashni taklif qildi.
Jahon chempionati davomida FIFA tanqidlar markazida bo‘ldi
2026 yilgi jahon chempionati davomida FIFA va uning prezidenti Janni Infantino bir necha bor tanqidlarga uchradi.
Eng katta bahslarga sabab bo‘lgan holatlardan biri AQSh terma jamoasi hujumchisi Folarin Baloganga nisbatan qo‘llangan diskvalifikatsiyaning bekor qilinishi bo‘ldi. Ommaviy axborot vositalari ma’lumotlariga ko‘ra, bu masala bo‘yicha AQSh prezidenti Donald Tramp Infantinoga shaxsan qo‘ng‘iroq qilgan.
Shuningdek, mutaxassislar va muxlislar FIFAni musobaqada sport jihatidan ko‘ra shou va tijoratga ko‘proq urg‘u berilgani uchun ham tanqid qildi. Xususan, reklama tanaffuslari, turli tantanali marosimlar va ko‘ngilochar dasturlar soni ortgani qayd etildi. Final uchrashuvining tanaffusida esa AQShdagi Super Bowl an’anasiga o‘xshash katta konsert-shou tashkil etildi.
Infantinoning xususiy samolyotdagi safarlari ham bahslarga sabab bo‘ldi
Associated Press agentligi hisob-kitoblariga ko‘ra, turnir davomida FIFA prezidenti Janni Infantino Qatar Airways aviakompaniyasiga tegishli xususiy samolyotda qariyb 95 ming kilometr masofani bosib o‘tgan va 43 ta uchrashuvda qatnashgan.
Bu holat FIFAning atmosferaga chiqariladigan SO₂ hajmini qisqartirish haqidagi va’dalarini hisobga olganda, tashkilotga nisbatan ikkiyuzlamachilik haqidagi tanqidlarni yanada kuchaytirdi.
Ispaniya jahon chempioni bo‘ldi
2026 yilgi futbol bo‘yicha jahon chempionati 11 iyundan 19 iyulgacha AQSh, Kanada va Meksikada o‘tkazildi. Turnir doirasida jami 104 ta uchrashuv bo‘lib o‘tdi.
Finalda Ispaniya terma jamoasi amaldagi jahon chempioni Argentinani 1:0 hisobida mag‘lub etib, 2026 yilgi mundial g‘olibi bo‘ldi.
