Poytaxt bozorlarida yong‘in va gaz xavfsizligi yuzasidan kuchaytirilgan tekshiruvlar o‘tkazildi

Rasmiy ma’lumotlarga ko‘ra, Toshkent shahar FVBB va uning hududiy boshqarmalari xodimlari, shuningdek, tegishli idora va tashkilotlar vakillari hamkorligida amalga oshirilgan reydlar doirasida bozorlar hududi va ular atrofida joylashgan barcha umumiy ovqatlanish joylari hamda ovqatlanish shoxobchalari atroflicha o‘rganildi.

Tekshiruvlar davomida ayniqsa quyidagi masalalarga alohida e’tibor qaratildi:

• isitish moslamalaridan xavfsiz foydalanish tartibi;
• gaz jihozlari va elektr uskunalaridan to‘g‘ri va texnik talablarga mos foydalanish;
• yong‘in kelib chiqishiga sabab bo‘lishi mumkin bo‘lgan kamchilik va qoidabuzarliklarni aniqlash;
• gaz-havo aralashmasi chaqnashi ehtimoliga olib keluvchi holatlarni oldindan bartaraf etish.

Profilaktik reyd tadbirlari jarayonida aniqlangan barcha kamchiliklarni zudlik bilan joyida bartaraf etish choralari ko‘rildi, mas’ullar va tadbirkorlarga tegishli ko‘rsatmalar berildi. Shuningdek, fuqarolar va bozor ma’muriyati bilan tushuntirish ishlari olib borilib, qish mavsumida yong‘in va gaz xavfsizligi qoidalariga qat’iy amal qilish lozimligi alohida ta’kidlandi.

Mutasaddilarga ko‘ra, bunday profilaktik tadbirlar aholi xavfsizligini ta’minlash, ehtimoliy ko‘ngilsizliklarning oldini olish hamda bozorlarda qishki mavsum uchun xavfsiz muhit yaratishga xizmat qiladi.