Yangi qonun: davlat ijtimoiy sug‘urtasi 2026 yil 1 yanvardan amal qiladi

“Davlat ijtimoiy sug‘urtasi to‘g‘risida”gi qonun qabul qilindi. Unga muvofiq, fuqarolarga nisbatan davlat ijtimoiy sug‘urtasi majburiy yoki ixtiyoriy asosda amalga oshiriladi hamda qonun 2026 yil 1 yanvardan kuchga kiradi.

Hujjatga ko‘ra, davlat ijtimoiy sug‘urtasi quyidagi sug‘urta hodisalari yuzaga kelganda amal qiladi:

kasallik munosabati bilan vaqtincha mehnatga layoqatsizlik;
homiladorlik va tug‘uruq;
ish yoki daromadni yo‘qotish.

Ushbu holatlar ro‘y bergan taqdirda sug‘urtalangan shaxslarga va (yoki) ularning oila a’zolariga davlat ijtimoiy sug‘urtasi bo‘yicha quyidagi to‘lovlar amalga oshiriladi:

vaqtincha mehnatga layoqatsizlik nafaqasi;
homiladorlik va tug‘uruq nafaqasi;
ishdan bo‘shatish nafaqasi.

Qonunda sug‘urta badali sug‘urtalangan shaxs uchun jamg‘armaga amalga oshiriladigan ajratma yoki to‘lov sifatida belgilangan. Davlat ijtimoiy sug‘urtasi bo‘yicha to‘lovlarni olish huquqi esa aynan shu sug‘urta badallarining to‘lanishiga qarab yuzaga keladi.

Davlat ijtimoiy sug‘urtasi bo‘yicha to‘lovlar qonunchilik hujjatlarida belgilangan miqdorlarda va tegishli davrlar uchun tayinlanishi ko‘zda tutilgan bo‘lib, yangi qonun fuqarolarning kasallik, homiladorlik yoki ishdan ayrilgan paytdagi ijtimoiy himoyasini kuchaytirishga qaratilgan.