Davlat ijtimoiy sug‘urtasi: nafaqalarni tayinlash va to‘lash tartibi tasdiqlandi

Nizomga ko‘ra, sug‘urta hodisalari bo‘yicha to‘lovlar bosqichma-bosqich joriy etiladi. Xususan, 2026 yil 1 yanvardan homiladorlik va tug‘ish nafaqasi, 2026 yil 1 iyuldan esa vaqtincha mehnatga layoqatsizlik nafaqasi to‘lanadi.

Hujjatda to‘lovlarni olish huquqi qaysi davrlarda yuzaga kelishi aniqlashtirilgan. Jumladan, sug‘urtalangan shaxs ish beruvchi bilan mehnat munosabatlarida bo‘lgan paytda, fuqarolik-huquqiy xususiyatga ega shartnomalar asosida xizmat ko‘rsatayotgan davrda yoki qonunchilikda belgilangan tartibda boshqa rasmiy faoliyat bilan band bo‘lgan vaqtida sug‘urta hodisasi ro‘y bersa, to‘lovlar tayinlanishi mumkin.

Nizomda sug‘urta staji bo‘yicha ham talablar belgilangan. Homiladorlik va tug‘ish nafaqasini olish uchun kamida 10 oy, vaqtincha mehnatga layoqatsizlik nafaqasini olish uchun kamida 6 oy sug‘urta staji mavjud bo‘lishi shart.

Qayd etilishicha, vaqtincha mehnatga layoqatsizlik nafaqasi mehnatga layoqatsizlik varaqasida ko‘rsatilgan barcha davr uchun to‘lanadi, biroq 1 kalendar yilda 182 kalendar kundan oshmagan qismi uchun amalga oshiriladi.

Shuningdek, homiladorlik va tug‘ish nafaqasi miqdorini hisoblashda sug‘urta stajiga mutanosib ravishda o‘rtacha oylik ish haqiga staj koeffitsiyenti qo‘llanadi: 10–24 oy uchun 75 foiz, 25–60 oy uchun 85 foiz, 61 oy va undan ortiq sug‘urta staji uchun 100 foiz.

Nizomga muvofiq, sug‘urtalangan shaxslarga tayinlangan davlat ijtimoiy sug‘urtasi bo‘yicha to‘lovlarni to‘lash moliyaviy agent tomonidan amalga oshiriladi.