Agrar to‘lovlar agentligi tuzildi: fermerlar uchun subsidiya olish tartibi soddalashadi

Prezident Shavkat Mirziyoyev ta’kidlaganidek, qishloq xo‘jaligi sohasini qo‘llab-quvvatlashga ajratilayotgan mablag‘lar yildan yilga ko‘payib bormoqda va kelgusida ham sohani moliyaviy jihatdan quvvatlash davom ettiriladi. Shu bilan birga, bu mablag‘larning o‘z vaqtida egasiga yetib borishi, hosildorlikni oshirishga xizmat qilishi uchun ochiq va shaffof tizim zarurligi qayd etildi.

Avval subsidiyalar 6 ta vazirlik tomonidan ajratib kelinar edi. Yangi agentlik tashkil etilishi natijasida barcha turdagi subsidiyalar bo‘yicha moliyaviy xizmatlar “bir darcha” tamoyili asosida ko‘rsatiladi. Unga ko‘ra, kelasi yil dehqon va fermerlarga 2 trillion 200 milliard so‘mlik subsidiya ajratilishi rejalashtirilgan.

Eng muhimi, subsidiya ajratish jarayoni hozirgi 4 bosqichdan 2 bosqichgacha qisqartiriladi, ularni olish muddati esa 1 oydan 15 kungacha tushiriladi. Yana bir muhim jihat shundaki, har bir subsidiya fermerlar uchun ma’qul bo‘ladigan shartlarda, mablag‘ eng zarur paytda yetkazib beriladigan tartibga o‘tiladi.

Keyingi yildan boshlab suv nasoslariga sarflangan elektr energiyasi uchun subsidiyalar meva-sabzavot, moyli ekin, kartoshka va ozuqa ekinlari yetishtiruvchi fermerlarga ham tatbiq etilishi ma’lum qilindi. Bu esa oziq-ovqat xavfsizligi va qishloq xo‘jaligi mahsulotlari hajmini ko‘paytirishga qaratilgan muhim qadam sifatida baholanmoqda.