O‘zbekiston va Qozog‘iston yuqori texnologik diagnostik laboratoriyalar tarmog‘ini tashkil etmoqchi

Uchrashuvdan avval mamlakat elchixonasi diplomatlari uchun Olimp guruhining Ostona shahridagi markaziy laboratoriyasi bo‘ylab tashrif tashkil etildi. Tashrif doirasida tibbiyot markazi faoliyati hamda Yevropa mamlakatlarida ishlab chiqarilgan zamonaviy uskunalar — Roche, Abbott, Sysmex, Qiagen, Beckman Coulter, Becton Dickinson, Eppendorf, Sartorius, Axygen, Thermo Fisher, Siemens, Illumina, Olympus, Carl Zeiss, GE va Philips kabi brendlar texnikalari bilan yaqindan tanishtirildi.

So‘ngra o‘tkazilgan muloqot chog‘ida O‘zbekiston–Qozog‘iston hamkorligi doirasida yuqori texnologik diagnostik laboratoriyalar tarmog‘ini yo‘lga qo‘yish, uning tashkiliy-huquqiy jihatlari hamda amaliy mexanizmlari atroflicha ko‘rib chiqildi.

Olimp kompaniyasi rahbari O‘zbekiston hukumati Qoraqalpog‘iston aholisining ijtimoiy farovonligini oshirishga alohida e’tibor qaratayotganini ta’kidlab, qo‘shma loyihani amalga oshirishni aynan Nukus shahridan boshlash rejalashtirilayotganini ma’lum qildi.

Ma’lumot uchun, Olimp kompaniyasi 2007 yilda Ostona shahrida faoliyatini boshlagan. Hozirda tarmoq Qozog‘istonning barcha hududlarida joylashgan 600 dan ortiq biomaterial qabul qilish va protsedura xonalari orqali xizmat ko‘rsatadi. Kompaniya tarkibida 20 ga yaqin zamonaviy laboratoriya faoliyat yuritadi. Tarmoqda 6 mingdan ziyod mutaxassis ishlaydi, 2 mingdan ortiq turdagi laborator tekshiruvlar amalga oshiriladi hamda yiliga 16 milliondan ziyod laborator test o‘tkazish imkoniyati mavjud.