Centrum Air bir o‘ringa 2 ta chipta sotishi natijasida ikki fuqaro Istanbul aeroportida qolib ketdi

Holat 26 sentabr kuni yuz bergan. Fuqaro Centrum Air sayti orqali Istanbul–Namangan yo‘nalishi uchun 2 ta chipta sotib olgan. Ammo aviakompaniya tomonidan ortiqcha chipta sotilgani natijasida u va turmush o‘rtog‘i samolyotga sig‘may, Istanbul aeroportida qolib ketgan. Bir sutkadan so‘ng ularga majburiy ravishda Istanbul–Toshkent reysida parvoz qilish taklif etilgan.

Foto: Centrum Air

Centrum Air aviakompaniyasi xatosi bilan Istanbul–Namangan reysiga sig‘may qolgan fuqarolarga kompensatsiya undirib berildi, deya xabar berdi Raqobat qo‘mitasi.

Qayd etilishicha, fuqaro 2025 yil 26 sentabr kuni Centrum Air sayti orqali Istanbul–Namangan yo‘nalishi uchun 2 ta chipta sotib olgan bo‘lsa-da, aviakompaniya tomonidan ortiqcha chipta sotilgani natijasida u va turmush o‘rtog‘i samolyotga sig‘may, Istanbul aeroportida qolib ketishgan. Bir sutkadan so‘ng ularga majburiy ravishda Istanbul–Toshkent reysida parvoz qilish taklif etilgan va fuqarolar shu reysda qaytib kelgan. U mazkur holatdan norozi bo‘lib, iste’molchilik huquqlari tiklanishi yuzasidan Raqobat qo‘mitasining hududiy boshqarmasiga murojaat qilgan.

Centrum Air aviakompaniyasi o‘z xatosi sabab yuzaga kelgan noqulaylik uchun fuqaro bilan kelishilgan holda quyidagi kompensatsiya va imtiyozlarni taqdim etgan:

500 yevro miqdorda kompensatsiya;
qo‘shimcha 865 200 so‘m pulli tovon;
aviakompaniyaning istalgan yo‘nalishlariga keyingi safar 20 foiz chegirma beruvchi promokod;
23 kg qo‘shimcha bepul bagaj;
parvoz davomida samolyotning birinchi qatoridagi joylardan bepul foydalanish imkoniyati.