Krasnodar o‘lkasida dron zarbasidan keyin neft mahsulotlari yonib ketdi

Krasnodar o‘lkasidagi Temryuk dengiz porti 25 dekabr, payshanba kuniga o‘tar kechasi uchuvchisiz apparatlar (dron) hujumiga uchradi. Bu haqda Rossiya janubidagi mintaqaning tezkor shtabi xabar qildi.

Hujum natijasida katta ko‘lamli yong‘in chiqqan bo‘lib, u taxminan 2 ming kv. metr maydonni qamrab olgan. “Yong‘inni o‘chirishga 70 nafar odam va 18 ta texnika birligi jalb qilingan, shu jumladan Krasnodar o‘lkasi bo‘yicha RF FVV Bosh boshqarmasi xodimlari ham”, — deyiladi xabarda.

Neft mahsulotlari saqlanadigan ikki rezervuar yongan. Dastlabki ma’lumotlarga ko‘ra, jabrlanganlar yo‘q.

Azov dengizining Temryuk qo‘ltig‘ida joylashgan Temryuk dengiz porti “Mechel” guruhiga tegishli. Port saytida qayd etilishicha, uning faoliyati umumiy yuklar, sochma va quyuq yuklarni qayta yuklash bilan, shuningdek, ishlab chiqarish va ombor quvvatlarini ijaraga berish bilan bog‘liq. Temryuk Rossiya janubida suyultirilgan uglevodorod gazini eksport qilish uchun asosiy port hisoblanadi, shu bilan birga neft yuklarini jo‘natishda ham qo‘llanadi.

5 dekabr kuni ham Temryuk porti ukrain dronlari hujumiga uchragan edi. O‘shanda ham portda yong‘in chiqqan va uni o‘chirishga 32 kishi hamda 8 ta texnika birligi jalb qilingan.

Noyabr oyida Ukraina Novorossiysk portiga ikki marta zarba bergan. 14 noyabr kungi hujum natijasida neft bazasi va sohil inshootlari shikastlangan, shundan so‘ng “Transneft” portga neft quyishni to‘xtatgan.

10 noyabr kuni Ukraina ekipajsiz katerlari (dengiz dronlari) Qora dengizdagi eng yirik neft quyish terminallaridan biri joylashgan Tuapse dengiz portiga hujum qilgan. Katerlardan biri sohil chizig‘i yonida portlagan. 2 noyabr kuni ham Tuapse dronlar hujumiga uchragan, shundan keyin terminal infratuzilmasi va pirs yonidagi tanker shikastlangan. Shundan so‘ng “Rosneft”ga qarashli Tuapse neftni qayta ishlash zavodi ishi to‘xtatilgan.