1 yanvardan maktab direktorlari va o‘rinbosarlariga KPI asosida oylik ustama to‘lanadi

2026 yil 1 yanvardan boshlab umumiy o‘rta ta’lim tashkilotlarida direktor va uning o‘rinbosarlariga direktor jamg‘armasi mablag‘lari hisobidan faoliyat samaradorligi ko‘rsatkichlari (KPI) natijasiga ko‘ra har oylik ustamalar belgilanadi. Direktorlar uchun eng yuqori ustama 20 foiz, o‘rinbosarlar uchun esa 10 foizgacha bo‘ladi.

Foto: Getty Images

Maktabgacha va maktab ta’limi sohasida boshqaruv samaradorligini oshirishga qaratilgan hujjatda 2026 yil 1 yanvardan direktor jamg‘armasi hisobidan KPI'ga qarab direktorga — 20 foizgacha, direktor o‘rinbosarlariga — 10 foizgacha miqdorida oylik ustamalar belgilanishi nazarda tutilgan.

Vazirlar Mahkamasining 2025 yil 21 oktyabrdagi 662-son qaroriga ko‘ra, baholash metodika va tartib — Maktabgacha va maktab ta’limi vazirligi tomonidan tasdiqlanadi, ko‘rsatkichlar — maktabning bchki guruhi tomonidan baholanadi, ustama miqdori — maktab to‘plagan umumiy ballga qarab belgilanadi.

Ballar diapazoniga ko‘ra ustamalar direktorlar uchun 61–70 ball — 3 foiz, 71–80 ball — 10 foiz, 81–90 ball — 15 foiz, 91–100 ball — 20 foiz. Direktor o‘rinbosarlari uchun 61–70 ball — 2,5 foiz, 71–80 ball — 5 foiz, 81–90 ball — 7,5 foiz, 91–100 ball — 10 foiz.

Ustama jamg‘armadagi mavjud mablag‘lar doirasida to‘lanadi. Ustama belgilanishi uchun direktor/o‘rinbosar mazkur maktabda kamida 9 oy asosiy lavozimda ishlagan bo‘lishi kerak.

Shuningdek, hududlardagi direktorlar kengashida faoliyat yuritayotgan ayrim tajribali direktorlarga ham jamg‘arma hisobidan 20 foiz oylik ustama to‘lanishi qayd etilgan.