London universiteti O‘zbekiston OTM bilan qo‘shma diplom dasturlariga tayyor

O‘zbekistonning Buyuk Britaniyadagi elchisi Ravshan Usmonov London universiteti Sharq va Afrika tadqiqotlari maktabi (SOAS) rektori, professor Adam Habib bilan uchrashdi. Bu haqda “Dunyo” AA xabar berdi.

Ma’lum qilinishicha, 1916 yilda tashkil etilgan mazkur ta’lim dargohi bugungi kunda 7 mingga yaqin talabani qamrab olgan bo‘lib, ularga 1,2 mingga yaqin professor-o‘qituvchi saboq beradi.

SOAS London universitetining mustaqil oliy ta’lim muassasasi hisoblanadi. Universitet Londonda to‘rtta akademik kampus va kutubxonaga ega. Shuningdek, u Hindiston, Bangladesh, Xitoy, Saudiya Arabistoni hamda Qozog‘iston oliy o‘quv yurtlari bilan qo‘shma ta’lim dasturlarini amalga oshiradi. Ta’lim yo‘nalishlari orasida ijtimoiy-gumanitar fanlar, shuningdek, Sharq va Afrika tillari bo‘yicha kurslar mavjud.

Uchrashuv chog‘ida professor Adam Habib O‘zbekiston va Buyuk Britaniya o‘rtasida ta’lim sohasidagi hamkorlikni yanada kengaytirishdan manfaatdor ekanini ta’kidladi. Uning qayd etishicha, tashkilot istiqbolli ta’lim loyihalarini amalga oshirish, qo‘shma diplom dasturlarini yaratish, professor-o‘qituvchilar almashinuvini yo‘lga qo‘yish, ilmiy tadqiqotlar va kasbiy rivojlanish yo‘nalishlarida O‘zbekiston oliy o‘quv yurtlari bilan o‘zaro manfaatli hamkorlikni rivojlantirishga tayyor.