O‘zbekistonliklar 2025 yilda inflatsiya 12 foiz bo‘ldi deb hisoblamoqda – MB

2025 yil dekabr oyida O‘zbekiston aholisi sezgan yillik inflatsiya darajasi noyabr oyiga nisbatan 0,2 foiz bandga oshib, 12,0 foizni tashkil etdi. Bu haqda Markaziy bank xabar berdi.

So‘rovnomada 3800 dan ortiq respondent ishtirok etgan. Ular bergan javoblarga qaraganda, sezilgan inflatsiya Toshkent shahrida eng yuqori – 14,3 foizni, Qashqadaryo viloyatida 14,1 foizni, Toshkent viloyatida 13,8 foizni tashkil etgan.

Xorazmliklar esa narx-navo oshishini hammadan ham kamroq sezishgan – 10,4 foiz. Samarqand viloyatida yashovchilar 10,6 foiz, Jizzax viloyati aholisi 10,9 foizlik inflatsiyani his etishgan.

Dekabr oyida aholi tomonidan narxlarida yuqori o‘sish kuzatilgan asosiy tovar va xizmatlar quyidagilar: go‘sht va sut, benzin va yoqilg‘i, meva va sabzavotlar, elektr va tabiiy gaz, dorilar, shuningdek, yo‘lkira va tashish xizmatlari.

Daromadlari 2 mln so‘mgacha bo‘lgan aholi qatlami eng kam – 10,5 foizlik inflatsiyani sezgan bo‘lsa, 20 mln so‘mdan ko‘proq daromad topuvchilar oxirgi 12 oyda narx-navo 17 foizdan ko‘proqqa oshdi deb hisoblamoqda.

Aholining 2026 yil uchun inflyatsion kutilmalari 11,5 foizni tashkil etyapti. Biznes vakillari esa joriy yilda 11,1 foizlik inflatsiyani taxmin qilmoqda.

Avvalroq Statistika qo‘mitasi 2025 yilda inflatsiya 7,3 foizga tushganini qayd etib, qaysi mahsulot qanchaga arzonlashgani yoki qimmatlashganini ma’lum qilgandi.