Tramp Kubani AQSh bilan “kech bo‘lmasdan oldin” kelishuv tuzishga chaqirdi

Kuba AQSh bilan “kech bo‘lmasdan oldin” “kelishuv tuzishi” kerak. AQSh prezidenti Donald Tramp yakshanba, 11 yanvar kuni Truth Social ijtimoiy tarmog‘ida shunday bayonot berdi.

Uning aytishicha, “ko‘p yillar Kuba Venesueladan katta hajmda neft va pul hisobidan yashab kelgan”, buning evaziga esa 1999–2013 yillarda Janubiy Amerika davlati prezidenti bo‘lgan Ugo Chavesga va Venesuela rahbari Nikolas Maduroga “xavfsizlik xizmatlari”ni ko‘rsatgan. Tramp ta’kidlashicha, Nikolas Maduroni AQSh armiyasining maxsus bo‘linmalari 3 yanvar kuni qo‘lga olgan.

Biroq endilikda vaziyat o‘zgaradi, deb yozadi Tramp: “Endi Kubaga na neft, na pul keladi — nol”. “Men ularga (Kuba hokimiyatiga — tahr.) kech bo‘lmasidan oldin kelishuv tuzishni (AQSh bilan — tahr.) qat’iy tavsiya qilaman”, — deya tahdid qildi Oq uy rahbari. AQSh prezidenti aynan qaysi kelishuvni nazarda tutayotganini aniq aytmadi va Havana uchun oqibatlar mohiyatini ham ochiqlamadi.

Kuba hokimiyati Donald Trampning bayonotlariga g‘azab bilan javob qaytardi. “Kuba hech qaysi mamlakatga ko‘rsatgan xavfsizlik xizmatlari uchun pul yoki moddiy mukofot olmagan va hech qachon olmaydi”, — deb ta’kidladi Kuba tashqi ishlar vaziri Bruno Rodriges 11 yanvar kuni X tarmog‘idagi mikroblogida.

“AQShdan farqli o‘laroq, bizda boshqa davlatlarga nisbatan yollanmachilik, shantaj yoki harbiy bosim bilan shug‘ullanadigan hukumat yo‘q, — deyiladi ushbu postda. — Boshqa har qanday mamlakat kabi, Kuba ham yonilg‘ini eksport qilishga tayyor bo‘lgan va AQShning bir tomonlama majburlovchi choralariga aralashuvsiz yoki bo‘ysundirilmasdan, tijoriy munosabatlarni rivojlantirish huquqini amalga oshirayotgan bozorlardan yonilg‘i import qilishga mutlaq huquqqa ega”.

“AQSh o‘zini jinoiy va nazoratsiz gegemon sifatida tutmoqda, u tinchlik va xavfsizlikka nafaqat Kubada va bu yarimsharda, balki butun dunyoda tahdid solmoqda”, — dedi Kuba TIV rahbari.

Nikolas Maduro va uning rafiqasi Siliya Flores 3 yanvar kuni “Delta” AQSh maxsus bo‘linmasi tomonidan “Mutlaq qat’iyat” nomli harbiy operatsiya doirasida qo‘lga olingan. Ularni avval AQSh harbiy-dengiz kuchlarining Guantanamodagi bazasiga, keyin esa Nyu-Yorkka olib ketishgan; 5 yanvar kuni u yerda ag‘darilgan rahbar ishtirokida ilk sud majlisi bo‘lib o‘tgan.

AQSh hokimiyati Maduroga rasman “narkoterrorizm”, qurol saqlash va Venesuela diplomatik pasportlari savdosi bo‘yicha ayblovlar qo‘ygan. Xususan, siyosatchiga AQShda avval terrorchi deb e’lon qilingan Cartel de los Soles jinoiy guruhini boshqargani, shuningdek, rafiqasi, o‘g‘li va safdoshlari bilan kokain ishlab chiqarish va tashish bilan shug‘ullanadigan Kolumbiya guruhlari bilan til biriktirish aybi qo‘yildi. Maduro bu ayblovlarni inkor qilib, ularni mamlakatining neft zaxiralariga kirish uchun “niqob” deb atagan.

Donald Tramp 11 yanvardagi postida da’vo qilishicha, Nikolas Maduroning xavfsizligini ta’minlagan kubaliklarning ko‘pchiligi AQSh harbiy operatsiyasi natijasida halok bo‘lgan. “Venesuelaga endi uni qancha yillar garovda ushlab turgan banditlar va tovlamachilardan himoya kerak emas. Endi Venesuelani himoya qilish uchun dunyodagi eng qudratli (ancha ustun!) Qo‘shma Shtatlar Qurolli kuchlari bor, va biz ularni himoya qilamiz!” — deb yozdi AQSh rahbari.