SSD’lar oltindek qimmatlashib ketdi

AQShdagi yirik savdo maydonlarida o‘tkazilgan tahlilga ko‘ra, 8 terabaytli NVMe SSD’larning o‘rtacha narxi 1400–1500 dollar atrofida. Taqqoslash uchun, hozir oltinning bir gramm narxi taxminan 148 dollar. Ya’ni 8 gramm oltin 1180 dollar chiqadi. Natijada SSD o‘z vazniga nisbatan qimmatroq bo‘lib qolmoqda.

Yanada tezkor va yuqori sifatli modellar bundan ham qimmat. Ayrim premium SSD’lar 2400 dollargacha sotilmoqda. Bu esa ularni deyarli qimmatbaho metall darajasiga olib chiqyapti.

4 terabaytli SSD’lar hozircha biroz barqarorroq. Oddiy fayllarni saqlash uchun mo‘ljallangan variantlarni 500–600 dollar atrofida topish mumkin. Biroq tezligi yuqori bo‘lgan modellar allaqachon 800 dollardan oshib ketgan. Narxlar so‘nggi ikki oy ichida keskin ko‘tarilgan.

Bu holatning asosiy sababi — xotira mikrosxemalari tanqisligi. Sun’iy intellekt va serverlar uchun mo‘ljallangan qurilmalar ko‘p miqdorda chip talab qilmoqda va mavjud resurslar aynan shu yo‘nalishga ketmoqda. Natijada SSD ishlab chiqaruvchilariga xomashyo yetishmayapti va narxlar oshmoqda. Hatto kelasi yil uchun rejalashtirilgan ishlab chiqarish hajmlari ham oldindan sotib bo‘lingan.

Muammo faqat SSD bilan cheklanmagan. Oddiy qattiq disklar ham sezilarli qimmatlashdi. Katta hajmli modellar bir necha oy ichida 40–50 foizga ko‘tarilgan.

Hozir SSD bozorida vaziyat murakkab. Narxlar yaqin orada tushishi kutilmayapti. Agar xotira kerak bo‘lsa, keyinroq arzonlashishini kutgandan ko‘ra, hoziroq xarid qilish ma’qul bo‘lishi mumkin.

Co‘nggi yangiliklardan xabardor bo‘lish muhim. Raqamli dunyoda adashib qolmaslik va shunday yangiliklarni birinchilardan bilish uchun KUN.UZ Texnologiya Telegram sahifasini kuzatib boring.