O‘zbekiston mudofaa doktrinasi qayta ko‘rib chiqiladi

Polshadagi Kierunek Kaukaz elektron portalida O‘zbekiston mudofaa sohasidagi islohotlar haqida maqola e’lon qilindi. Unda prezident Shavkat Mirziyoyev Xavfsizlik kengashining kengaytirilgan yig‘ilishida 8 yil avval qabul qilingan mudofaa doktrinasi hamda 1997 yilgi Milliy xavfsizlik konsepsiyasini zamonaviy tahdidlardan kelib chiqib qayta ko‘rib chiqishni taklif etgani qayd etilgan.

Foto: Kun.uz

“Dunyo” axborot agentligi xabar berishicha, Polshaning Kierunek Kaukaz portali jurnalist Kasper Oxman qalamiga mansub, O‘zbekiston mudofaa sohasida amalga oshirilayotgan islohotlarga bag‘ishlangan materialni e’lon qildi.

Nashrda ta’kidlanishicha, prezident Shavkat Mirziyoyev Xavfsizlik kengashining kengaytirilgan yig‘ilishida mamlakat mudofaa doktrinasini qayta ko‘rib chiqish tashabbusini ilgari surgan. Uning fikricha, mintaqaviy va global vaziyat tez o‘zgarib borayotgan bir sharoitda harbiy xavfsizlik va mudofaa tizimini mustahkamlash masalasi dolzarb ahamiyat kasb etmoqda.

Materialda qayd etilishicha, 2018 yilda qabul qilingan mudofaa doktrinasi va 1997 yilgi milliy xavfsizlik konsepsiyasini qayta ko‘rib chiqish vaqti kelgan. Bu hujjatlar yangi xavf-xatar va tahdidlar manzarasi, shuningdek, harbiy sohada texnologiyalarning jadal rivojlanishi hisobga olingan holda yangilanishi zarurligi urg‘ulangan.

Yig‘ilishda mudofaa sohasidagi xavf-xatarlarning oldini olishga qaratilgan tizimli va faol (proaktiv) yondashuvga o‘tish zarurligi aytiladi. Shu bilan birga, Qurolli kuchlarni modernizatsiya qilishda harakatchanlikni oshirish, boshqaruv samaradorligini kuchaytirish, ishlab chiqarish quvvatlarini rivojlantirish, shuningdek, raqamli yechimlar va zamonaviy texnologiyalardan keng foydalanish ustuvor yo‘nalishlar sifatida ko‘rsatilgan.

Nashrda, shuningdek, texnologik daraja va barqarorlikni oshirish maqsadida mudofaa sanoatini rivojlantirish, raqamli yechimlar bilan bir qatorda sun’iy intellekt elementlarini joriy etish masalalariga ham alohida e’tibor qaratilgani keltiriladi.

Kadrlar masalasi ham kun tartibida bo‘lgan: armiyaning inson kapitalini rivojlantirish, harbiy ta’lim tizimini takomillashtirish, jumladan Harbiy xavfsizlik va mudofaa universitetida raqamli hamda intellektual ta’lim texnologiyalarini keng qo‘llash muhimligi ta’kidlangan.

Bundan tashqari, materialda harbiy xizmatning yangi modeli ustida ishlash vazifasi qayd etilgan: u harbiy xizmatchilarga professional ko‘nikmalarni egallash, demobilizatsiyadan keyin esa o‘zini real hayotda (mehnat bozorida) topishi uchun imkoniyat va istiqbol yaratishi kerak.