Xorijdagi bo‘sh ish o‘rinlarini xususiy bandlik agentliklari o‘rtasida taqsimlash tartibi tasdiqlandi

“Xorijdagi bo‘sh ish o‘rinlarini xususiy bandlik agentliklari o‘rtasida taqsimlash tartibi to‘g‘risida”gi nizom Adliya vazirligida davlat ro‘yxatidan o‘tkazildi. Nizomga ko‘ra, Migratsiya agentligi xorijiy ish beruvchilardan jalb qilingan vakansiyalarni elektron platformada e’lon qiladi va ular ochiq tanlov orqali xususiy bandlik agentliklari o‘rtasida taqsimlanadi.

Foto: mahalladosh.uz

Adliya vazirligida “Xorijdagi bo‘sh ish o‘rinlarini xususiy bandlik agentliklari o‘rtasida taqsimlash tartibi to‘g‘risida”gi nizom davlat ro‘yxatidan o‘tkazildi (ro‘yxat raqami: 3772-son, 2026 yil 9 fevral).

Nizom Migratsiya agentligi tomonidan xorijiy ish beruvchilar va rekruting tashkilotlaridan jalb qilingan bo‘sh ish o‘rinlarini xususiy bandlik agentliklari o‘rtasida ochiq tanlov yo‘li bilan taqsimlash tartibini belgilaydi.

Hujjatga muvofiq, agentlik xorijiy ish beruvchilar va rekruting tashkilotlaridan kelib tushgan vakansiyalar haqidagi ma’lumotlarni elektron platformada e’lon qiladi. Bu haqda xususiy bandlik agentliklarining elektron platformadagi shaxsiy kabinetlariga avtomatik xabarnoma yuboriladi.

Shuningdek, kvotalar to‘g‘risidagi e’lon muddati kamida 5 ish kuni bo‘lishi shart. Xususiy bandlik agentliklari e’lon joylashtirilgan kundan boshlab belgilangan muddat tugagunga qadar ariza yuborishlari mumkin.

Kvotalar bo‘yicha arizasi ijobiy qabul qilingan xususiy bandlik agentliklari o‘rtasida kvotalar teng taqsimlanishi belgilangan.