XVJ Kiyevga 8 mlrd dollarlik to‘rt yillik kreditni ma’qulladi

Shuningdek, Ukrainaga darhol taxminan 1,5 mlrd dollar (1,3 mlrd yevro) to‘lanishi ham nazarda tutilgan. Bu haqda 26 fevral, payshanba kuni XVJ matbuot xizmati xabar qildi.

Moliyalashtirish Ukraina uchun 136,5 mlrd dollar (115,6 mlrd yevro) miqdoridagi xalqaro qo‘llab-quvvatlash paketining bir qismi hisoblanadi.

Dastur makroiqtisodiy va moliyaviy barqarorlikni mustahkamlash, shuningdek boshqaruv sohasini ham o‘z ichiga olgan tarkibiy islohotlarni ilgari surishga qaratilgan. Maqsad — urushdan keyin barqaror tiklanishni ta’minlash va Ukrainaning YeIga a’zo bo‘lish yo‘lidagi harakatini qo‘llab-quvvatlash.

Jamg‘arma qo‘shimcha qilishicha, kreditning ma’qullanishi Ukraina xalqaro donorlari va hamkorlari tomonidan katta hajmdagi imtiyozli moliyalashtirishni safarbar etishga yordam berishi kutilmoqda.

XVJ ta’kidlashicha, yangi dastur avval amal qilgan EFF-2023 kreditlash mexanizmiga tayanadi va bir vaqtning o‘zida jang harakatlari davom etayotgani bilan bog‘liq muammolarni ham hal qilishga qaratilgan.

Mablag‘lar to‘rt yil davomida 136,5 mlrd dollarlik budjet taqchilligini qoplashga yo‘naltiriladi. Reuters agentligi eslatishicha, bu hafta Jahon banki, YeI, BMT va Ukraina hukumati yangi hisobot e’lon qildi: unga ko‘ra, Ukrainani keyingi o‘n yilda tiklash uchun 588 mlrd dollar (498 mlrd yevro) talab etiladi.

XVJ bosh direktori Kristalina Georgiyevaning aniqlik kiritishicha, Ukraina bo‘yicha tinchlik muzokaralari muvaffaqiyatli yakunlansa, dastur tezkor ravishda moslashtirilishi mumkin. Kredit, shuningdek, korrupsiyaga qarshi kurashish va soliq to‘lashdan bo‘yin tovlashning oldini olishga qaratilgan tarkibiy islohotlarni ilgari surishga xizmat qilishi kerak.

XVJ prognoz qilishicha, 2026 yilda Ukraina iqtisodiyoti 1,8–2,5 foizga o‘sadi, inflatsiya esa, ehtimol, 6,1 foiz atrofida saqlanib qoladi.

Urush boshlanganidan beri Ukrainada iqtisodiy faollik front chizig‘idan g‘arbiy hududlarga ko‘chgan, mudofaa sanoatida bandlik ko‘rsatkichlari oshgan.

Berlindagi Rockwool fondi tadqiqotiga ko‘ra, Rossiyaning to‘liq ko‘lamli bosqini boshlanganiga to‘rt yil bo‘lganiga qaramay, Ukraina mehnat bozori xavotirlarga zid ravishda hayratlanarli barqarorlik namoyon etmoqda. Reuters 22 fevral kuni tadqiqot natijalarini keltirib, urushning ilk oylarida 20 foizdan oshgan ishsizlik hozir taxminan 11 foizni tashkil etishini — ya’ni urushdan oldingi darajadan atigi bir necha foiz punktga yuqori ekani haqida xabar bergan.