Eron islom respublikasi oliy rahnamosi, oyatulloh Ali Xominaiy AQSh va Isroilning shanba kungi zarbalari oqibatida halok bo‘ldi.
Dastlab Isroil nashrlari mamlakat rasmiylariga tayanib, Ali Xominaiy Tehrondagi qarorgohiga berlgan zarba oqibatida halok bo‘lgani haqida xabar tarqatgandi. Ko‘p o‘tmay Isroil bosh vaziri Binyamin Netanyahu «Eron oliy rahbari Ali Xominaiy tirik qolmaganining ko‘plab belgilari borligi»ni aytib chiqdi.
Keyinroq AQSh prezidenti Donald Tramp ham bu haqda yozdi. U Xominaiyni «tarixdagi eng yovuz kishilardan biri» deb atab, endi Eron xalqida «o‘z mamlakatini qaytarib olishga katta imkoniyat paydo bo‘lgani»ni aytgan. U Eron politsiyasi va Islom inqilobi muhofizlari korpusi a’zolarini Eron xalqi tomoniga o‘tishga chaqirgan.
Tramp Yaqin Sharqda tinchlik o‘rnatish uchun Eron bo‘ylab zarbalar davom etishini qo‘shimcha qilgan.
Yakunda Eron tomoni bu ma’lumotni tasdiqladi, davlat televideniyesida oliy rahbarning o‘limi haqidagi rasmiy bayonot o‘qib eshittirildi. Mamlakatda 40 kunlik motam e’lon qilindi. Unda Xominaiy hujum vaqtida o‘z ish joyida, ya’ni qarorgohida bo‘lgani aytiladi.
Bayonotda oyatulloh Ali Xominaiy ehtiromga sazovor islomiy diniy arbob sifatida ta’riflanadi. Shuningdek, «uning shahidlik haqidagi uzoq orzusi» ro‘yobga chiqqani va muqaddas Ramazon oyida vafot etgani ta’kidlangan. «Eron dushmanlari shuni bilishi kerakki, mamlakat rahbarining o‘limi zulmkorlarga qarshi kurashda ulkan qo‘zg‘olonni alangalantiradi», – deyiladi bayonotda.
Sun’iy yo‘ldosh orqali olingan tasvirlarda Xominaiyning qarorgohi vayron bo‘lgani aks etgan. Reuters agentligi xarobalar ostidan Xominaiyning jasadi topilganini ma’lum qilgan.
Eron Islom inqilobi muhofizlari korpusi ham Xominaiyning o‘limi haqida bayonot bergan. Unda bu voqea Eronni yanada qat’iyatli qilishi bildirilgan.
Xominaiy xuddi Eron prezidenti Mas’ud Pizishkiyon kabi Isroil zarbalarining asosiy nishonlaridan biri bo‘lgan. Hozirda Pizishkiyon qayerdaligi ma’lum emas.
Eron tashqi ishlar vaziri Abbos Aroqchi shanba kuni NBC News telekanaliga bergan intervyusida oyattulloh va Pizishkiyon tirikligi hamda xavfsizlikda ekanini aytgandi.
