Qoʻshimcha funksionallar
-
Tungi ko‘rinish
NATO Eron xavfi ortidan raketaga qarshi mudofaani kuchaytiradi
Turkiya tomon yo‘nalgan Eron raketaci urib tushirilgan hodisadan keyin NATO harbiy rahbariyati raketaga qarshi mudofaa tizimlarining jangovar tayyorgarlik darajasini oshiradi.
Turkiyaning Eron tomonidan raketadan o‘qqa tutilganidan so‘ng NATO raketaga qarshi mudofaa tizimlarini yuqori jangovar shaylik holatiga o‘tkazmoqda. Bu haqda 5 mart, payshanba kuni Shimoliy Atlantika alyansining Yevropadagi birlashgan qurolli kuchlari markaziy shtabi matbuot kotibi, polkovnik Martin O’Donnell ma’lum qildi.
Turkiya harbiylari 4 mart kuni Eron hududidan uchirilgan raketa to‘xtatib qolinganini ma’lum qildi. U Sharqiy O‘rta Yer dengizida joylashtirilgan NATOning havo hujumidan va raketa hujumidan mudofaa tizimlari tomonidan yo‘q qilingan. Raketa parchalaridan biri Turkiyaning Hatay viloyatidagi Do‘rtyo‘l tumani hududiga tushgan. Turkiya Mudofaa vazirligi bildirishicha, hech kim jabrlanmagan.
O’Donnellning ta’kidlashicha, raketa 10 daqiqadan kam vaqt ichida aniqlangan va urib tushirilgan. U keskinlashuv fonida mintaqaga qo‘shimcha raketaga qarshi mudofaa tizimlari ko‘chiriladimi-yo‘qmi, bu haqda aniqlik kiritmadi.
Bundan oldin NATO matbuot kotibi Elison Hart alyans Eronning Turkiya tomon raketa uchirganini va Tehronning butun mintaqa bo‘ylab tartibsiz hujumlarini qoralashini aytgan edi. Shu bilan birga, AQSh mudofaa vaziri Pit Hegset ta’kidlashicha, Erondan Turkiya havo hududi tomon uchirilgan ballistik raketaning yo‘q qilinishi Shimoliy Atlantika shartnomasining jamoaviy mudofaa tamoyilini belgilab beruvchi 5-moddasini qo‘llashga olib keladi, deb hisoblash uchun asos yo‘q.
Anqara Eronga qarshi urushda rasman betaraflikni saqlab turibdi va mojaroni diplomatik yo‘l bilan hal etishga chaqirmoqda. Raketa hodisasidan keyin Turkiya hokimiyati mamlakatga qarshi qaratilgan har qanday dushman harakatlarga javob berish huquqini o‘zida saqlab qolishini bildirdi.
Bayonotda shunday deyiladi: «Hududimiz va havo makonimizni himoya qilish uchun zarur bo‘lgan barcha choralar qat’iy va ikkilanmasdan amalga oshiriladi».
Turkiyada Amerika qo‘shinlari ham joylashgan: NATOning asosiy Injirliq aviabazasida taxminan 1500 nafar AQSh harbiy xizmatchisi bor. Vashington ma’lumotiga ko‘ra, aynan shu baza Eron hujumining nishoni bo‘lgan.
Shu bilan birga, Eron bu hujumni inkor etmoqda. Tehron ta’kidlashicha, mamlakat qurolli kuchlari Turkiyaning, «qo‘shni va do‘st davlat» sifatidagi suverenitetini hurmat qiladi.
