Orban “Drujba” quvuri ta’miri tugamaguncha Ukrainaga yordamni to‘sib qo‘yadi

Vengriya bosh vaziri Viktor Orban Yevropa moliyaviy yordamini Ukrainaga ajratilishini Kiyev Rossiya neftini uning mamlakatiga yetkazib berish uchun xizmat qiluvchi “Drujba” neft quvurining ishini tiklamagunicha to‘sib turadi. Bu haqda Orban 6 mart, juma kuni, Vengriyaning Kossuth radiosi efirida ma’lum qildi.

Uning aytishicha, “Drujba” neft quvurining to‘xtab qolishi texnik muammolar bilan bog‘liq emas, balki go‘yoki Kiyevning “siyosiy qarori”ga asoslangan. Orban, shuningdek, neft quvuri orqali neft yetkazib berish qayta yo‘lga qo‘yilgan taqdirda ham Ukrainaga yordam bo‘yicha vetosini bekor qilishga kafolat bermadi.

“Biz Ukrainaning Rossiya arzon energiyasidan voz kechish talabini bajarmaymiz”, — dedi Orban. U, shuningdek, Vengriya Yevropa Ittifoqining Rossiya energiya tashuvchilari yetkazib berishga embargo joriy qilish to‘g‘risidagi qarorini bajarmasligini aytdi. Siyosatchi so‘zlariga ko‘ra, Vengriya o‘z manfaatlarini himoya qilish uchun “barcha vositalardan” foydalanishga tayyor.

“Biz Ukrainaga benzin yetkazib berishni to‘xtatdik, dizel yonilg‘isini ham yetkazib bermayapmiz, ammo elektr energiyasini yetkazib berishda davom etyapmiz. Shuningdek, Ukraina uchun muhim bo‘lgan tovarlarni Vengriya orqali tranzit qilishni ham Ukrainadan neft yetkazib berishga ruxsat olmaguncha to‘xtatamiz”, — dedi Orban.

Bundan oldin Ukraina prezidenti Volodimir Zelenskiy Rossiya nefti Vengriya va Slovakiyaga tashiladigan “Drujba” neft quvuri ishi qayta tiklanguniga qadar yana bir necha hafta o‘tishi mumkinligini aytgan edi. Shu bilan birga, u shaxsan o‘zi quvurni tiklashni ma’qul ko‘rmasligini ham anglatib o‘tdi.

Quvur shikastlanganiga qaramay, ayni paytda Vengriya va Slovakiyaning neft ta’minoti xavf ostida emas. Yevrokomissiya ma’lumotiga ko‘ra, har ikki mamlakatda taxminan uch oyga yetadigan neft zaxirasi mavjud. Shuningdek, Xorvatiya foydalanadigan Adriatika neft quvuri orqali muqobil yetkazib berish ham mumkin, ammo bu Rossiya neftiga nisbatan qimmatroqqa tushadi. Eron bilan urush esa neft narxining yanada oshishiga qo‘shimcha omil bo‘lmoqda.

Bundan bir kun oldin Vengriya bosh vaziri Rossiya neftini “Drujba” orqali yetkazib berishni kuch ishlatib qayta tiklash bilan tahdid qildi. U, shuningdek, Kiyevdagi hukumat yig‘ilishida aytilgan bayonotlar sabab Ukraina prezidenti Volodimir Zelenskiyni o‘ziga tahdid qilganlikda aybladi.

Jumladan, Zelenskiy “Yevropa Ittifoqidagi bir odam 90 milliard yevroni to‘sib qo‘ymasligiga va ukrain jangchilari qurol olishiga” umid bildirgan edi. Ukraina prezidenti ta’kidlaganidek, “aks holda, biz o‘sha odamning manzilini yigitlarimizga beramiz, ular unga qo‘ng‘iroq qilib, u bilan o‘z tilida gaplashadi”.

Zelenskiyning bu bayonoti nafaqat mamlakat rasmiylari, balki Vengriya muxolifatchi siyosatchisi, yaqinlashib kelayotgan saylovlarda Orbanning asosiy raqibi Peter Madyar tomonidan ham tanqid qilindi. “Hech bir xorijiy davlat rahbari hech bir vengerga — na ketish arafasidagi Orban hukumatiga, na kelajakdagi ‘Tisa’ hukumatiga, na biror vengerga tahdid qila olmaydi”, — dedi Madyar.

5 mart kuni Vengriya kuch ishlatar tuzilmalari Avstriya va Ukraina o‘rtasida pul va qimmatbaho boyliklar tashigan davlatga qarashli “Oshchadbank”ning ikki inkassator avtomobili va yetti nafar xodimini ushladi. Ukraina Tashqi ishlar vazirligi buni “garovga olish va davlat terrorizmi” deb atadi.

Vengriya soliq xizmati ushlanganlarga nisbatan pul yuvish ayblovi qo‘yilganini e’lon qildi. Idora alohida ta’kidlashicha, ushlangan yetti nafar “Oshchadbank” xodimidan biri Ukraina maxsus xizmatlarining sobiq yuqori lavozimli xodimi bo‘lgan. Bu haqda Vengriyaning Index nashri xabar berdi.