Putin chet ellik harbiylar bo‘yicha yangi qonunni imzoladi

Putin imzolagan qonunga ko‘ra, agar chet elliklar Rossiya armiyasida xizmat qilgan va Rossiyaning jangovar harakatlarida qatnashgan bo‘lsa, ular jinoiy ta’qib yoki hukmni ijro etish uchun boshqa davlatga topshirilmaydi.

Foto: Oleg Xarseyev / Kommersant’

Rossiya Federatsiyasi prezidenti Vladimir Putin imzolagan qonunga ko‘ra, Rossiya qurolli kuchlarida yoki boshqa tuzilmalarda harbiy xizmatni o‘tayotgan yoki o‘tagan hamda jangovar harakatlarda ishtirok etgan chet el fuqarolari va fuqaroligi bo‘lmagan shaxslarni jinoiy ta’qib qilish yoki hukmni ijro etish uchun xorijiy davlatlarga topshirish taqiqlanadi.

Tegishli hujjat 8 mart, yakshanba kuni huquqiy hujjatlar portalida joylashtirildi.

O‘zgartishlar Rossiya Federatsiyasi Jinoyat-protsessual kodeksining 464-moddasi birinchi qismiga kiritildi. Ushbu modda shaxslarni so‘rov asosida topshirishni rad etish masalasiga taalluqli.

Bundan avval, 2025 yil 10 noyabr kuni, RBK, “Interfaks” agentliklari va “Vedomosti” gazetasi o‘z manbalariga tayanib, Rossiya hukumatining qonun loyihalari faoliyati bo‘yicha komissiyasi mazkur tashabbusni qo‘llab-quvvatlaganini xabar qilgan edi.

Bundan oldin, 2025 yil 8 iyul kuni, Putin boshqa bir farmonni imzolagan edi — u chet elliklarga safarbarlik davrida Rossiya armiyasida xizmat qilishga ruxsat beradi.

Hujjatga ko‘ra, shartnomalar safarbarlik tugaguncha, harbiy holat bekor qilinguncha yoki urush vaqti muddati tugaguncha tuzilishi lozim. Shu vaqtga qadar chet elliklarning Rossiya armiyasida xizmat qilishi faqat favqulodda holat yoki harbiy holat sharoitida, shuningdek qurolli mojarolar davrida mumkin edi.

Putinning 2022 yil 21 sentabrda, Rossiyaning Ukrainaga keng ko‘lamli bostirib kirishi fonida qabul qilingan safarbarlik haqidagi farmoni hozirgacha bekor qilinmagan va hanuz amal qilmoqda.

AQSh razvedkasi ma’lumotlariga ko‘ra, Rossiya qurolli kuchlari har oy taxminan 30 ming nafar harbiy xizmatchini yollagan, Yevropa baholariga ko‘ra esa bu raqam 40 ming nafarni tashkil qilgan.

Rossiya Xavfsizlik kengashi raisining o‘rinbosari Dmitriy Medvedev 2025 yil 2 iyul kuni yil boshidan beri Ukrainaga qarshi urushda qatnashish uchun 210 ming kishi Mudofaa vazirligi bilan shartnoma tuzganini ma’lum qilgan edi. Bu har oyga o‘rtacha 35 ming kishidan to‘g‘ri keladi.