Йўл ҳаракати хавфсизлиги хизмати автомобиллар “техпаспорти”нинг амал қилиш муддатига чеклов қўйилгани юзасидан изоҳ берди.
Ҳукумат қарори билан, автомототранспорт воситасини рўйхатдан ўтказиш ҳақидаги гувоҳнома энди 5 йил муддатга берилади. Бунгача “техпаспорт”ларнинг амал қилиш муддати йўқ эди.
ЙҲХХ изоҳига кўра, муддатнинг чекланиши – 2026 йил 1 апрелдан бошлаб бериладиган гувоҳномалар учун татбиқ этилади.
2026 йил 1 апрелга қадар берилган “техпаспорт”лар токи қонунчиликда белгиланган сабаблар туфайли алмаштириш зарурати келмагунча, амал қилишда давом этаверади.
ЙҲХХ бу янгиликни “транспорт воситасининг кузов, двигател сингари асосий агрегатларининг мавжудлигини инвентаризациядан ўтказиш мақсади” билан изоҳлаган. Ваҳоланки, таъкидлаш керакки, агрегатлар мавжудлиги – мажбурий характерга эга даврий техник кўриклар давомида ҳам текшириб келинади.
Эслатиб ўтамиз, автомототранспорт воситаси рўйхатдан ўтказилганлиги тўғрисида гувоҳномани бериш учун тўлов миқдори базавий ҳисоблаш миқдорининг 70 фоизи (ҳозирда 288 400 сўм) деб белгиланган. Ушбу тўлов амал қилиш муддати тугаган гувоҳномани янгилашга нисбатан ҳам татбиқ этиладими, бу ҳақда маълумот берилмади.
