Fransiya okean ustida eng qimmat yo‘lni qurmoqda

Eski yo‘l 1959 yilda qurilgan bo‘lib, okean va tik vulqon qoyalari orasidan o‘tadi. Undan kuniga 80 mingga yaqin mashina foydalanadi, ammo siklonlar, kuchli to‘lqinlar va tosh ko‘chishlari sababli yo‘l juda xavfli hisoblanadi.

Shuning uchun muhandislar yo‘lni qoyalardan uzoqroqqa — okean tomonga chiqarishga qaror qilgan. Loyihada dambalar va uzun viaduklar qurish rejalashtirilgan. Asosiy qism — 5,4 kilometrlik Grand-Shalup viaduki bo‘lib, u Fransiyadagi eng uzun ko‘prikka aylangan.

Biroq loyiha jiddiy muammolarga duch keldi. Dambalar uchun kerakli tosh hajmi avval taxmin qilinganidan ancha ko‘p bo‘lib chiqdi. Karerlar ochilishiga esa mahalliy aholi va ekologlar qarshi chiqdi. Sud ham ayrim karerlarni taqiqladi. Shu sababli qurilish sekinlashdi.

Loyiha qiymati 2 milliard yevrodan oshib ketgan. 2021 yilda ayrim beton himoya bloklari noto‘g‘ri o‘rnatilgani ham ma’lum bo‘ldi. 2022 yilda hukumat qolgan qismni damba emas, balki yana viaduk sifatida qurishga qaror qildi.

Hozircha yo‘l to‘liq bitmagan. Ayrim uchastkalar ochilgan, ammo haydovchilar hali ham xavfli eski yo‘ldan foydalanishga majbur. Asosiy qurilish 2027 yilda boshlanishi, loyiha esa 2030 yilda yakunlanishi rejalashtirilgan.