100 ming dollarlik iltimos. Tramp Gretsiyadagi elchisidan nega voz kechdi?

Ikkinchisi – 100 ming dollar talabi. Respublikachi homiy Erik Detersning WSJ gazetasiga aytishicha, Gilfoyl 2025-yil iyulida, Senatdagi tasdiqlash tinglovi arafasida, undan American Express kartasidagi 100 ming dollarlik qarzni toʻlashni soʻragan.

Buning evaziga u Detersga «Tramp dunyosida yo birga yuradigan, yo birga oʻladigan» hamroh boʻlishni vaʼda qilgan. «Asalim, iltimos, bugun buni men uchun hal qilib berishing kerak», deya yozishmalardan birini keltirmoqda NYT. Deters esa soʻralgan pulni toʻlamagan, Gilfoyl advokati bu yozishmalar haqiqiyligiga shubha bildirmoqda.

Uchinchisi – Davosdagi janjal. WSJ maʼlumotiga koʻra, Gilfoyl 2026-yil yanvarida Davosda prezidentning yana bir oʻgʻli Erik Tramp sharafiga berilgan ziyofatga kirishga uringan. Audioyozuvda u bir amerikalik tadbirkorga «Senga butun dunyoni yetkazib bera olaman», deydi.

Ayblovlar Vashingtonda ham jiddiy qabul qilindi. Associated Press agentligi avvalroq yuqori martabali amaldorga tayanib, prezident Tramp va Davlat kotibi Marko Rubio elchi haqidagi xabarlardan gʻazablanganini yozdi. 12-oktabrda Trampning oʻzi «Koʻrib chiqyapmiz, mamnun emasmiz», dedi. 13-oktabrda esa Oq uy isteʼfoni rasman soʻradi.

Shuningdek, agentlik Davlat departamenti bosh inspektori ayblovlarni oʻrganayotganini yozdi. Biroq rasmiy tergov boshlangani hali nomaʼlum.

Tramp va Gilfoylning oʻzi nima deydi?

Trampning ohangi bir necha kun ichida keskin oʻzgardi: 9-oktabrda u ayblovlar haqida endigina eshitganini aytib, «Afsus», degandi. Reuters xabariga koʻra, 13-oktabrda esa jurnalistlarga «U yaxshi ishlayotgandi, lekin oʻqiganlarimiz bizga yoqmadi», dedi.

NYT yozishicha, prezident Gilfoyl bilan yaqinligini ham ahamiyatsiz qilib koʻrsatdi. «U mening oilam aʼzosi emasdi. Menimcha, u ancha oldin oʻgʻlim bilan uchrashib yurgan», dedi Tramp.

Gilfoyl esa ayblovlarni keskin rad etmoqda. U ijtimoiy tarmoqdagi postida «Bu ayblovlar yolgʻon. Men nomim, obroʻyim va halolligimni qatʼiyat bilan himoya qilaman», deb yozdi. U Tramp va Rubioga minnatdorligi va hurmati «oʻzgarmas» ekanini ham taʼkidladi.

Uning advokatlari esa homiydan soʻralgan pul nomzodligidan oldingi chiqishlari uchun haq boʻlganini va u toʻlanmaganini aytgan.

Gretsiya hukumatining sukunati

Afina rasmiylari elchi atrofidagi muhokamani cheklashga urinayotgandek koʻrinadi. Xususan, Gretsiya tashqi ishlar vazirligi NYT'ga isteʼfo haqida izoh berishdan bosh tortgan. Isteʼfodan keyin esa Bosh vazir oʻrinbosari Kostis Xadzidakis buni AQShga tegishli masala deb atadi va ikki davlat munosabatlariga taʼsir qilmasligini aytdi.

Afina hukumati asosan elchi bilan boʻlgani aytilgan bir suhbat yuzasidan munosabat bildirgandi. WSJ maʼlumotiga koʻra, 2026-yil mart oyida Afinadagi ziyofatda Gilfoyl Gretsiya energetika vaziri Stavros Papastavru bilan Ruminiya hukumatining qulashi haqida bahslashgan. Shunda u AQShni nazarda tutib, «Buni bu yerda ham qila olamiz», degan.

Elchining advokati ham, vazir ham bu talqinni rad etgan. Hukumat matbuot kotibi Pavlos Marinakis «Gretsiya hukumatiga tahdid qilinishi haqida hech qachon gap boʻlmagani»ni aytgandi.

Gretsiya muxolifati ancha keskin gapirmoqda. Markaz-chap PASOK partiyasi vakili Dimitris Mansos elchini lavozimdan olish qarori xabarlarga «bilvosita ishonch bagʻishlashi»ni bildirdi. Boshqalar rasmiy Afinani ayblovlarga javob bermaganlikda aybladi.

Elchining Tramp oilasi bilan aloqalari

Gilfoyl uzoq yillar Tramp oilasining eng yaqin doirasida boʻlgan. U 2018-yilda kichik Donald Tramp bilan uchrasha boshlagan, juftlik 2020-yilda unashtirilgan. CNN maʼlumotiga koʻra, 2020-yilgi saylovda Gilfoyl Tramp kampaniyasining moliya boʻyicha raisi boʻlgan.

Elchilikka tayinlanish ham shu munosabatlar bilan bogʻliq koʻrinadi. 2024-yil dekabrida saylangan prezident Gilfoylni Gretsiyadagi elchilikka nomzod qilib tanlaganini eʼlon qilgan. Tramp oʻshanda «Koʻp yillar davomida Kimberli yaqin doʻst va ittifoqchi boʻlib kelgan», deb yozgandi.

NYT yozishicha, nomzodlik eʼlon qilingan vaqt Tramp uni oʻgʻli uchun noqulay paytda mamlakatdan uzoqlashtirmoqchi boʻlganiga ishora qilardi: bundan bir kun oldin kichik Tramp boshqa ayol restorandan chiqayotgani rasmlari tarqaladi. Gilfoyl tarafdorlari esa buni rad etgan.

Elchi 100 ming dollar soʻragan respublikachilar homiysi Deters ham Tramp oilasi bilan bogʻliq. The Hill'ning yozishicha, u oʻz festivalida chiqish uchun bir necha yil davomida Gilfoylga 300 ming, kichik Trampga 200 ming, Erik Trampga 100 ming dollar toʻlaganini aytgan.

Afinadagi shov-shuvli elchilik

Gilfoyl Afinada birinchi kundanoq diqqat markaziga aylandi. Reuters'ning yozishicha, u Vogue jurnalining Gretsiya nashri muqovasiga chiqqan va yunon mashhurlari bilan tungi ziyofatlarda qatnashgan.

Shu bilan birga, elchi AQSH manfaatlarini faol ilgari surgani aytiladi: u Amerika suyultirilgan gazini import qilish va ExxonMobil ishtirokidagi burgʻilash bitimlarini imzolashda ishtirok etgan.

Uning Afinadagi bayonotlari diplomatik toʻlqinlarni ham keltirib chiqargan. Masalan, u mahalliy OAVga bergan ilk intervyusida Xitoyni Pirey portidagi 67 foizlik ulushini sotishga chaqirgan. Bu port Pekinning «Bir makon, bir yoʻl» tashabbusidagi muhim boʻgʻinlardan biri hisoblanadi. Xitoyning Gretsiyadagi elchisi esa bunga javoban AQShni «gegemonlik tafakkuri»da ayblagan.

Mojaro Gretsiyaning AQSH uchun ahamiyati fonida yanada sezilarli. Reuters taʼkidlashicha, Gretsiya NATOdagi muhim ittifoqchi sifatida AQShga Sharqiy Oʻrta yer dengizida asosiy harbiy obyektlarni taqdim etadi. U Qizil dengizda tijorat kemalarini qoʻriqlovchi Yevropa Ittifoqi missiyasiga ham rahbarlik qiladi.