Mattias Follert Germaniyaning O‘zbekistondagi favqulodda va muxtor elchisi etib tayinlandi.
O‘zbekiston tashqi ishlar vaziri Baxtiyor Saidov yangi elchining ishonch yorliqlari nusxasini qabul qildi.
Uchrashuvda ikki tomonlama kun tartibidagi dolzarb masalalar muhokama qilindi. Shuningdek, oliy darajada erishilgan kelishuvlarni o‘z vaqtida va sifatli amalga oshirish muhimligi ta’kidlandi.
Qayd etilishicha, O‘zbekiston Germaniyani Yevropadagi ishonchli va vaqt sinovidan o‘tgan hamkorlardan biri sifatida yuksak qadrlaydi. So‘nggi yillarda oliy darajadagi tashriflar hamda muntazam siyosiy muloqotlar natijasida O‘zbekiston–Germaniya munosabatlari izchil rivojlanib bormoqda.
Mattias Follert bu lavozimda Manfred Xuterer o‘rnini egalladi. U ilgari Germaniya Tashqi ishlar vazirligida Janubiy Kavkaz, Markaziy Osiyo va Sharqiy sheriklik bo‘yicha bo‘linmani boshqargan.
