Askarlarni kasbga o‘qitish uchun davlat mablag‘i ajratiladi

O‘zbekistonda muddatli harbiy xizmatni o‘tayotgan askarlarni kasb-hunarga o‘qitish xarajatlari davlat hisobidan qoplab berilishi rejalashtirilmoqda. Bu bo‘yicha tegishli nizom loyihasi ishlab chiqildi.

Hujjatga ko‘ra, muddatli harbiy xizmatchilarni kasbga o‘qitishdan asosiy maqsad — ularni xizmatdan bo‘sh vaqtda va xizmatni tugatgandan keyin mehnat bozorida talab yuqori bo‘lgan kasblarga o‘rgatish hamda bandligini ta’minlashdan iborat.

Loyihaga asosan, o‘quv jarayonlari Bandlikka ko‘maklashish davlat jamg‘armasi mablag‘lari hisobidan moliyalashtiriladi. Mablag‘lar o‘quv kurslarini tashkil etish, pedagog va boshqa xodimlar mehnat haqi, shuningdek, tegishli ajratmalarni qoplash uchun yo‘naltiriladi.

Shuningdek, uzoq hududdan kelib dars o‘tadigan pedagoglarning yo‘l xarajatlari ham xarajatlar kalkulyatsiyasiga kiritiladi.

Nizom loyihasida texnikumlar, harbiy qismlar va hududiy bandlik boshqarmalari o‘rtasida mablag‘ ajratish hamda hisobot yuritish tartibi ham belgilab qo‘yilgan.

Hujjatda qayd etilishicha, o‘quv jarayoniga jalb etilgan pedagog va boshqa xodimlarga ish haqi Mehnat kodeksida belgilangan muddatlarda to‘lab boriladi.