Zangiota tumanidagi 24-sonli tarbiya koloniyasida prezident tashabbusi bilan amalga oshirilayotgan “Ikkinchi imkon” loyihasining rasmiy ochilish marosimi bo‘lib o‘tdi. Loyiha doirasida 18 yoshdan 30 yoshgacha bo‘lgan mahkumlar axborot texnologiyalari, raqamli kasblar va xorijiy tillarga o‘qitiladi.
Kun.uz tadbirda ishtirok etgan mutasaddilardan mahkumlarning kelajakda ish bilan ta’minlanishi, beriladigan sertifikatlarning mehnat bozoridagi ahamiyati va o‘qituvchilarni saralash mezonlari haqida so‘radi.
Prezident tashabbusi bilan yo‘lga qo‘yilayotgan “Ikkinchi imkon” loyihasi respublikaning Toshkent viloyati, Navoiy va Qashqadaryo viloyatlaridagi 10 ta jazoni ijro etish muassasasida amalga oshiriladi. Loyihaga ko‘ra, 18 yoshdan 30 yoshgacha bo‘lgan mahkumlar saralab olinib, IT, raqamli texnologiyalar hamda mehnat bozorida talab yuqori bo‘lgan kasblarga o‘qitiladi.
Ichki ishlar vaziri Aziz Toshpo‘latov mahkumlarning kelajakda ish bilan ta’minlanish mexanizmlari haqida gapirdi.
“O‘qitish natijasi bo‘yicha oraliq so‘rovlar bo‘lib o‘tadi. O‘shaning har birini baho berib qo‘yiladi. Boshqa kurslarda qanaqa baholansa, bu yerda ham xuddi shunaqa baholanadi va kelajakda bularga malakaviy sertifikat beradi. Har bitta sertifikat bizning hamma qonunlarimiz bo‘yicha barcha tizimlarda to‘liq qabul qilinadi. Sertifikat olganlar kelajakda o‘zining imkoniga qarab, olgan bilimiga qarab ishga taklif qilinadi. Albatta, ish bilan ta’minlanadi hammasi.
Bularga ish bozorida takliflar juda ham ko‘p. Eng tez rivojlanayotgan bozor – axborot texnologiyalari sohasi. Mutaxassislarga yetishmovchilik juda katta. Shuning uchun bularga imkoniyat yaratib beriladi. Eng muhimi, bular o‘zining ota-onasiga, oilasi davrasiga prezidentimiz yaratib bergan sharoitdan foydalanib, kamida bitta xorijiy til va zamonaviy, yaxshi daromad topish imkonini beradigan hunar egasi bo‘lib boradi”, – dedi vazir.
Raqamli texnologiyalar vaziri Sherzod Shermatovga ko‘ra, maqsad faqat sertifikat berish emas, daromadli ish bilan ta’minlash.
“Birinchi narsa, bu haqiqiy natija uchun qilinayotgan loyiha. Ya’ni bu qandaydir davlat pulini ishlatish yoki xarajat qilish uchun emas. Prezidentimizning maqsadi – jazoni ijro etish muassasasidagi yoshlar ham ertaga hayotda o‘z o‘rnini topishi.
Baribir qamoqdan chiqqanidan keyin ishga joylashishda qiyinchiliklar bo‘ladi. Lekin hozir IT sohasida chet tilini va kasbni bilsangiz, frilans platformalari orqali ham bemalol daromad topish mumkin. Shuning uchun ham bu loyiha “Ikkinchi imkon” deb nomlangan.
