Ro‘yxatga olishning dastlabki natijalari O‘zbekiston aholisi soni 39 047 321 nafar ekanini ko‘rsatdi. Bu haqda Milliy statistika qo‘mitasi raisi Behzod Hamroyev ma’lum qildi.
Ro‘yxatga olish natijasidagi aholi soni rasmiy statistikadan 810,6 ming nafarga farq qilmoqda.
- O‘zbekiston aholisi soni oxirgi marta ro‘yxatga olish o‘tkazilgan 1989 yildagi ro‘yxatga olish natijalariga nisbatan 2 barobarga oshgan.
Aholining 54,5 foizi shaharlarda, 45,5 foizi qishloq joylarda yashamoqda.
Ro‘yxatga olishda aholining 97,3 foizi qamrab olindi
Qayd etilishicha, aholini ro‘yxatga olishda umumiy aholining 97,3 foizi ro‘yxatga olingan.
Aholining 2,7 foizi esa turli sabablarga ko‘ra ro‘yxatga olish jarayonlarida ishtirok etmagan.
Ta’kidlanishicha, mazkur ko‘rsatkich xalqaro me’yorlar bo‘yicha normal holat hisoblanadi. Ayrim davlatlar tajribasida ro‘yxatga olish jarayonida qamrab olinmagan aholi ulushi 10 foiz va undan yuqori bo‘lgan holatlar ham kuzatilgan.
Ro‘yxatga olish xarajati
Dastlabki hisob-kitoblarga ko‘ra, bir nafar aholini ro‘yxatga olish uchun sarflangan xarajat 0,12 AQSh dollarini tashkil etgan.
Statqo‘m izohiga ko‘ra, mazkur ko‘rsatkich ro‘yxatga olish jarayonini tashkil etishda raqamli texnologiyalardan samarali foydalanilgani hamda tashkiliy xarajatlar maqbullashtirilganini ko‘rsatadi.
Eslatib o‘tamiz, aholi va qishloq xo‘jaligini ro‘yxatga olish 2026 yil yanvar-fevral oylarida bo‘lib o‘tgan edi.
