Shavkat Mirziyoyev faol yoshlar bilan uchrashdi

Tashrif davomida davlat rahbari mahalla hayoti, ekologiya, muhandislik, kitobxonlik madaniyati va tadbirkorlik sohalarida amalga oshirilayotgan tashabbuslar taqdimoti bilan tanishib, loyiha mualliflari bilan muloqot qildi.

Farg‘ona tumanidagi Obod mahallasi yoshlar yetakchisi Islombek Muhammadjonov tashkil etgan “Obod ta’lim” o‘quv markazi orqali 600 nafar yosh zamonaviy kasblar va xorijiy tillarga o‘qitilgani, xalqaro hamkorlik yo‘lga qo‘yilgani va mahallada yoshlar ishsizligi hamda jinoyatchilikning bartaraf etilishiga erishilgani qayd etildi.

Shuningdek, “Yashil tashabbuslar” jamg‘armasi koordinatori Gulira’no Mamirovaning ekologik va “yashil” innovatsiyalar sohasidagi loyihalari, rassom Odinaxon Ma’murjonovaning ijodiy ishlari hamda jismoniy imkoniyati cheklangan bolalar uchun “O‘qi va yuksal” loyihasini amalga oshirayotgan Chinora G‘ulomovaning tashabbuslari yuksak baholandi. Prezident ushbu yo‘nalishlardagi loyihalarni tizimli qo‘llab-quvvatlash bo‘yicha mas’ullarga topshiriqlar berdi.

Ko‘rgazmaning startaplar maydonida Prezident maktabi bitiruvchisi, Chikago universiteti talabasi Asilbek Ashurov sun’iy intellekt asosidagi Makon AI ta’lim platformasini taqdim qildi. Bugungi kunda mazkur startap 100 mingdan ortiq foydalanuvchiga ega bo‘lib, investorlardan 380 ming dollar sarmoya jalb qilgani va loyiha qiymati 3 million dollarga baholangani ma’lum qilindi.

Shuningdek, dunyoning yetakchi akseleratorlaridan biri – Y Combinator dasturining birinchi o‘zbek ishtirokchisi Sardorbek Rahmatulloyevning startap sohasidagi yutuqlari ham e’tirof etildi. Prezident yuqori texnologiyali loyihalarni mamlakatda keng joriy etish va yosh tadbirkorlarni xalqaro bozorlarga olib chiqish davlat siyosatining ustuvor yo‘nalishlaridan biri bo‘lib qolishini ta’kidladi.

Muhandislik va innovatsiyalar yo‘nalishida Turin politexnika universiteti talabasi Biloliddin Ismoilov mahalliy antidron tizimlarini yaratish bo‘yicha ishlari haqida ma’lumot berdi. Nukus davlat texnika universiteti talabasi Ayzada Asanovaning “Yangi avlod avtomobillari” loyihasi esa hududlarda muhandislik maktablari salohiyati yuksalib borayotganini namoyon etdi.

Uchrashuvda madaniy-ma’rifiy yo‘nalishdagi yutuqlar ham e’tirof etildi. Xalqaro tanlovlar sovrindori Nigina Faxriddinova va yosh musiqachi Amina Avazovaning muvaffaqiyatlari, shuningdek, kitobxonlikni ommalashtirishga qaratilgan “Mutolaa” raqamli platformasi faoliyati taqdim etildi. Loyiha rahbari Sirojiddin Olimovning ma’lum qilishicha, ilova qariyb 5 million marta yuklab olingan bo‘lib, unda o‘qilgan kitoblar soni 18 milliondan oshgan.

Zulfiya nomidagi Davlat mukofoti sohibi Nilufar Ergasheva esa O‘zbekistonning adabiy xaritasini yaratish va adabiy turizmni rivojlantirishga qaratilgan takliflarini bildirdi.

Uchrashuv yakunida prezident Shavkat Mirziyoyev yoshlar tomonidan ilgari surilgan istiqbolli g‘oya va tashabbuslarni qo‘llab-quvvatlash, ularni amaliyotga keng joriy etish bo‘yicha tegishli vazifalarni belgilab berdi.