Kubada yana umummilliy elektr uzilishi yuz berdi

Kubaning davlat elektr operatori Unión Eléctrica ma’lum qilishicha, 6 iyul kuni mamlakatning yagona elektr tarmog‘i to‘liq ishdan chiqqan. Hozirda mamlakat bo‘ylab elektr ta’minotini bosqichma-bosqich tiklash ishlari olib borilmoqda.

Dastlabki ma’lumotlarga ko‘ra, avariya sabablari hali aniqlanmagan. Mutaxassislar texnik nosozlik yuzasidan tekshiruv o‘tkazmoqda.

Mamlakatdagi navbatdagi energetik inqiroz AQSh tomonidan Kubaga nisbatan iqtisodiy va siyosiy bosim kuchaytirilgan davrga to‘g‘ri keldi. Kuba hozirda ichki ehtiyoj uchun zarur yoqilg‘ining atigi 40 foizini mustaqil ta’minlay oladi.

2026 yil yanvaridan buyon AQSh sanksiyalari tufayli orolga faqat bitta Rossiya tankeri orqali neft yetkazib berishga ruxsat berilgan. Mart oyi oxirida keltirilgan 730 ming barrel neft zaxirasi may oyiga kelib to‘liq sarflab bo‘lingan.

Shu sababli mamlakatda elektr stansiyalari uchun yonilg‘i yetishmovchiligi yanada kuchaygan. May oyida Kuba hukumati davlat yonilg‘i zaxiralari deyarli tugaganini rasman ma’lum qilgan edi.

So‘nggi oylarda Kuba aholisi bir necha bor yirik elektr uzilishlariga duch keldi. Mart oyida butun mamlakat bir necha soat davomida elektrsiz qolgan bo‘lsa, may oyida orolning sharqiy hududlarida ham shunga o‘xshash yirik avariyalar kuzatilgan.

Elektr energiyasini tejash maqsadida mamlakat hukumati rejali elektr o‘chirish amaliyotini ham qo‘llamoqda. Ayrim hududlarda elektr ta’minoti 24 soatgacha to‘xtatilishi mumkin.

Energetika va iqtisodiy inqirozni yengish maqsadida Kuba hukumati keyingi oylarda mamlakat iqtisodiyotida so‘nggi 65 yil ichidagi eng yirik islohotlarni boshladi. Xususan, xususiy sektorga kengroq imkoniyat berish va qariyb 200 ta bozor islohotini amalga oshirish taklif qilingan.

Biroq rasmiy Havana va Vashington o‘rtasidagi muzokaralar hozircha natija bermayapti. Xalqaro kuzatuvchilarning fikricha, AQSh ma’muriyati iqtisodiy va siyosiy bosim orqali Kubadagi amaldagi hukumatni almashtirishga erishishni maqsad qilgan.