Kuba 2026-2027 oʻquv yilini belgilangan muddatda boshlashga tayyorgarlik koʻrmoqda. Ammo mamlakatdagi yoqilgʻi, elektr energiyasi, transport va zarur mahsulotlar tanqisligi maktablarni ham ogʻir sharoitda qoldirgan, deya yozadi Reuters.

Kuba taʼlim vaziri Naima Truxilo mamlakatdagi vaziyat murakkabligicha qolayotganini bildirgan. Uning taʼkidlashicha, umuman yangi oʻquv yilini boshlashning oʻzi bu sharoitda katta natija hisoblanadi.

Oʻqituvchilar nega maktablarni tark etmoqda?

Kubada pedagoglar tanqisligiga asosiy sabablardan biri – ish haqining pastligi va mamlakatdagi iqtisodiy qiyinchiliklar. Inflyatsiya sharoitida oʻqituvchilarning daromadi kundalik ehtiyojlarni qoplashda yetarli boʻlmay qolgani sababli ularning bir qismi yaxshiroq haq toʻlanadigan boshqa ishga oʻtgan, yana bir qismi esa mamlakatni tark etgan.

Bu muammo yangi emas: tadqiqotlar Kubada oʻqituvchilarning boshqa sohalarga ketishi 1990-yillardan beri davom etayotgani va bu pedagoglar tanqisligini uzoq muddatli muammoga aylantirganini koʻrsatadi.

Yangi oʻquv yilida bu boʻshliqni toʻldirish uchun universitet talabalari, boshqa sohalar mutaxassislari va nafaqadagi oʻqituvchilar darslarga jalb qilinadi. Qoʻshimcha yuklama oladigan pedagoglar uchun qoʻshimcha haq toʻlash rejalashtirilgan.

Mamlakat poytaxti Gavanada vaziyat ancha keskin. U yerda oʻqituvchilar yetishmasligini qisman qoplash uchun mamlakatning sharqiy hududlaridan qariyb 3 ming nafar pedagog yuboriladi.

Oʻquvchilarga maktab formasi ham yetishmayapti

Muammo faqat kadrlar masalasi bilan cheklanmaydi. Kubada elektr energiyasi uzilishi va ishlab chiqarishdagi qiyinchiliklar maktab formalari taʼminotiga ham taʼsir qilgan. Rasmiy maʼlumotlarga koʻra, boshlangʻich sinf oʻquvchilari uchun zarur maktab formalarining atigi 12 foizi ishlab chiqarilgan.

Shu sabab Taʼlim vazirligi maktablarni kiyinish masalasida moslashuvchan boʻlishga chaqirdi. Oʻquvchilar maktab formasi oʻrniga qulay kiyimda, anʼanaviy qizil galstuklari bilan darsga kelishlari mumkin.

Elektr va transport muammosi ham maktablarga taʼsir qilmoqda