AQSh Davlat departamenti Kubaga 100 million dollarlik humanitar yordam paketi doirasida birinchi samolyot jo‘natilganini ma’lum qildi. Reuters agentligiga ko‘ra, bu yangi yordam dasturining amaliy bosqichi boshlanganini anglatadi.
Ma’lum qilinishicha, samolyotda oziq-ovqat mahsulotlari, gigiyena vositalari va boshqa zarur anjomlar olib kelingan. Yordam yuklari xalqaro Catholic Relief Services humanitar tashkiloti orqali bevosita aholiga tarqatiladi. Dastlabki bosqichda 700 nafarga yaqin kubalik oila ushbu yordamdan bahramand bo‘lishi kutilmoqda.
AFP agentligi eslatishicha, Vashington avval ham katolik humanitar tashkilotlari bilan hamkorlik qilib, «Melissa» dovulidan jabr ko‘rgan Kuba hududlariga 9 million dollarlik yordam yetkazgan edi.
AQSh davlat kotibi Marko Rubio mazkur humanitar paket haqida may oyidayoq e’lon qilgan. Uning ta’kidlashicha, dasturning asosiy maqsadi Kuba aholisini qo‘llab-quvvatlashdan iborat. Shu bilan birga, Vashington Kuba hukumatiga nisbatan iqtisodiy bosimni kuchaytirishda davom etmoqda. AQSh moliyaviy sanksiyalar joriy etgan, shuningdek, orolga neft yetkazib berishga cheklovlarni ham kuchaytirgan.
Kuba hukumati dastlab mazkur taklifga ehtiyotkorlik bilan munosabat bildirgan. Rasmiy Havana AQShni mamlakatdagi elektr energiyasi tanqisligi va tovarlar yetishmovchiligining asosiy sababchilaridan biri sifatida ayblagan. Biroq Donald Tramp ma’muriyati vakillari bilan o‘tkazilgan muzokaralardan so‘ng Kuba humanitar yordamni qabul qilishga rozilik bergan.
Shu bilan birga, AQSh va Kuba o‘rtasidagi siyosiy munosabatlar keskinligicha qolmoqda. 15 iyul kuni CBS News Pentagon Kubaga nisbatan ehtimoliy harbiy operatsiya ssenariylarini, jumladan, 101-desant diviziyasi harbiylarini orolga tushirish imkoniyatini ham ko‘rib chiqayotgani haqida xabar bergan edi. Biroq amerikalik amaldorlar hozircha bunday operatsiya bo‘yicha yakuniy qaror qabul qilinmaganini bildirgan.
AQSh mudofaa vaziri Pit Hegset avvalroq Kuba AQSh xavfsizligiga tahdid soluvchi qurol-yarog‘larni qo‘lga kiritsa, kuch ishlatish ehtimoli istisno qilinmasligini aytgan. Uning so‘zlariga ko‘ra, razvedka ma’lumotlari Kuba Guantanamo harbiy bazasi, AQSh harbiy kemalari va Florida hududiga ehtimoliy zarbalar uchun 300 dan ortiq dron sotib olganini ko‘rsatgan.
Biroq CBS News manbalariga ko‘ra, AQSh va Isroilning Eron bilan davom etayotgan harbiy mojarosi sharoitida Kubaga qarshi keng ko‘lamli harbiy operatsiya yaqin vaqtda amalga oshirilishi ehtimoli past. Shu sababli Vashington hozircha Kubaga asosan iqtisodiy va diplomatik bosim o‘tkazish strategiyasiga tayanib turibdi.
23 iyun kuni AQSh Kubaning bir qator yirik davlat kompaniyalariga qarshi yangi sanksiyalar joriy qildi. Ular orasida mamlakat iqtisodiyotining katta qismi ustidan nazorat o‘rnatgan GAESA konglomerati bilan bog‘liq korxonalar ham bor. Kuba tashqi ishlar vaziri Bruno Rodriges ushbu cheklovlarni mamlakatga qarshi navbatdagi iqtisodiy bosim deb baholadi.
