Aktyor Sem Nil vafot etdi

Yangi zelandiyalik aktyor Sem Nil 78 yoshda vafot etdi. Nilning oilasi aktyor Sidneydagi klinikalardan birida, oila a’zolari va boshqa yaqinlari davrasida ko‘z yumganini bildirgan. Unga 2022 yilda onkologik kasallik tashxisi qo‘yilgan, 2026 yil aprel oyi oxirida uning o‘zi bu kasallikni muvaffaqiyatli yengib o‘tganini xabar qilgandi.

Avstraliya bosh vaziri Entoni Albaniz ham aktyorning o‘limi yuzasidan hamdardlik bildirdi. «Sem kasallikka qarshi har bir nutqiga kuch bag‘ishlagan o‘sha qadr-qimmat, yumor va ishonch bilan kurashdi. Unga qattiq aza tutishadi va uni uzoq vaqt yodda saqlashadi», – deya yozgan Albaniz X ijtimoiy tarmog‘ida.

Sem Nil (to‘liq ismi Nayjyel Jon Dermot Nil) 1947 yil 14 sentabrda Shimoliy Irlandiyada dunyoga kelgan, o‘sha vaqtda uning otasi harbiy xizmatni shu yerda o‘tayotgandi. 1954 yilda Nillar oilasi otasining vataniga – Yangi Zelandiyaga qaytadi. Nil faoliyatini teatr aktyori sifatida boshlagan. «Uxlayotgan itlar» (Sleeping Dogs, 1977) filmidagi ijrosi uning faoliyatida burilish yasaydi – bu yangi zelandiyaliklarning AQShda keng miqyosda namoyish etilgan ilk filmi bo‘lgandi. Shundan keyin Nil Hollivud filmlarida ko‘rinish berishni boshlaydi.

«Reyli: Josuslar qiroli» (1983 yil) mini-serialidagi roli uchun uni «Oltin globus» uchun nomzod sifatida ko‘rsatishgandi.

1993 yilda Nil «Pianino» filmida (rejissyor va ssenariynavis Jyeyn Kempion) suratga tushadi. Ushbu kartina dastlab Kann kinofestivalida «Oltin palma yaprog‘i» mukofotini qo‘lga kiritadi, keyinroq bir necha yo‘nalishda «Oskar» g‘olibi bo‘ladi. Xuddi o‘sha yili Stiven Spilberg tomonidan suratga olingan va bosh rollardan birini Nil ijro etgan «Yura davri parki» filmi katta ekranlarga chiqadi. Keyingi yillarda aktyor ushbu franshizaning bir necha sikvellarida suratga tushadi.

O‘zbek tomoshabini uni 1998 yilda ishlangan «Buyuk Merlin» teleseriali (bosh qahramon, sehrgar Merlin rolini o‘ynagan) orqali tanigan. Nil keyinroq «Tyudorlar» (The Tudors, 2007-2010) va «O‘tkir viqorlilar» (Peaky Blinders, 2013-2022) kabi mashhur seriallarda ham rol ijro etdi, «Simpsonlar» va «Rik va Morti» epizodlarida ko‘rinish berdi. 

Umuman, aktyor 50 yillik faoliyati mobaynida 150 dan ortiq film va seriallarda rollar ijro etgan.