Prezident Shavkat Mirziyoyev 21 iyul kungi selektorda iqtisodiy diplomatiya samaradorligini oshirish bo‘yicha topshiriqlar berdi.
Ma’lum qilinishicha, so‘nggi yillarda oliy darajadagi 52 ta tashrif doirasida 213 milliard dollarlik 1 617 ta investitsiya loyihasi bo‘yicha kelishuvlarga erishilgan. Lekin bu loyihalar ijrosini nazorat qilishda sustkashliklar kuzatilyapti.
Endilikda “yo‘l xaritalari” Hisob palatasi va Tashqi ishlar vazirligi tomonidan yuritilishi belgilandi.
Bosh vazirga har hafta tarmoq rahbarlari, hokimlar va elchilar bilan birga “yo‘l xaritalari”ni davlatlar kesimida, “loyihabay” muhokama qilish topshirildi.
Diplomatik vakolatxonalar bo‘yicha reviziya
O‘zbekistonning xorijdagi diplomatik vakolatxonalari faoliyati bo‘yicha ko‘p e’tirozlar bor, dedi yig‘ilishda Shavkat Mirziyoyev.
Xususan, Belarusdagi elchi Rahmatulla Nazarov investitsiya va tashqi savdo masalalariga befarqligi uchun lavozimidan ozod etilgan. U ushbu lavozimda 2024 yil fevralidan buyon ishlab kelayotgandi.
Shuningdek, Fransiya, Avstriya, Ispaniya, Italiya, O‘mon, Indoneziya, Malayziya va Singapurdagi elchilarning faoliyati ham yetarli darajada ko‘rinmayapti.
Prezident administratsiyasi rahbari Saida Mirziyoyevaga komissiya tuzib, iqtisodiy diplomatiya, investitsiya va eksport bo‘yicha diplomatik vakolatxonalarning ishini tahlil qilish, o‘z vazifasini bajara olmayotganlarni yosh, zamonaviy fikrlaydigan kadrlar bilan almashtirish yuzasidan takliflar kiritish topshirildi.
