АҚШ Марказий қўмондонлиги (CENTCOM) 21 июл куни кечқурун Эронга қарши яна бир кенг кўламли ҳарбий операция амалга оширилганини маълум қилди. Қайд этилишича, маҳаллий вақт билан соат 19:00 да бошланган авиаҳужумлар 75 дақиқа давом этган ва шу тариқа Эронга қарши 11-кеча кетма-кет ўтказилган зарбалар якунланган.
CENTCOM баёнотига кўра, операция давомида Эроннинг ҳарбий оператив бошқарув марказлари, денгиз кучлари объектлари, авиация ангарлари, учувчисиз учиш аппаратлари сақланадиган омборлар ҳамда ҳарбий логистика инфратузилмаси нишонга олинган. Америка ҳарбийлари бу зарбалар Эроннинг Ҳўрмуз бўғозида халқаро савдо кемаларига таҳдид солиш имкониятларини янада чеклаш мақсадида амалга оширилганини таъкидлади.
АҚШ маълумотларига кўра, сўнгги уч ой ичида Эрон Ҳўрмуз бўғози орқали ҳаракатланган 30 дан ортиқ тижорат кемасига ҳужум қилган. Шу билан бирга, CENTCOM май ойидан буён қарийб 900 та тижорат кемасининг хавфсиз ўтишига кўмаклашгани ва улар орқали 450 миллион баррел хом нефт ташилганини билдирди. Бироқ, Лондон фонд биржаси маълумотларига кўра, 19 июл куни бўғоз орқали атиги тўртта, 18 июл куни эса саккизта кема ўтган.
Айни пайтда, америкалик таҳлилчиларнинг GlobalSecurity порталига кўра, Эрон 21 июл давомида Кувайтдаги Camp Arifjan ҳарбий базасига ракета ва дронлар билан ҳужум уюштирган. Бу базада АҚШ ҳарбийлари жойлашган. Кувайт ҳукумати мамлакат ҳаво мудофаа тизимлари ракета ва дронларни йўқ қилганини маълум қилди.
Эрон Ислом инқилоби муҳофизлари корпуси эса Nasr 2 операциясининг олтинчи босқичи амалга оширилганини эълон қилиб, Кувайт ва Баҳрайндаги АҚШ ҳарбий объектларига зарбалар берилганини билдирди. Бироқ мазкур даъволар ҳозирча мустақил манбалар томонидан тасдиқлангани йўқ.
Аввалроқ, 20 июл куни ҳам Эрон Форс кўрфази минтақасида АҚШнинг олдинги тунги ҳужумларига жавоб сифатида ракета ва дронлардан фойдаланган ҳолда зарбалар берган эди. Шунингдек, 18 июл куни Теҳрон июн ойида Вашингтон билан эришилган вақтинчалик сулҳ келишувини бекор қилинган деб ҳисоблашини маълум қилган.
АҚШ президенти Доналд Трамп эса 21 июл куни Эронни америкалик ҳарбийлар ҳалок бўлган ҳар қандай ҳолат учун «бир неча баробар қаттиқ жавоб» кутишидан огоҳлантирди. Унинг айтишича, бу бўйича топшириқ мудофаа вазири Пит Ҳегсетга берилган.
CENTCOM маълумотига кўра, янги кескинлашув бошланганидан буён АҚШнинг уч нафар ҳарбийси ҳалок бўлган. Шу тариқа, феврал ойи охиридан буён Эрон билан боғлиқ можарода ҳалок бўлган америкалик ҳарбийлар сони 17 нафарга етган.
