AQShning Nevada shtati gʻarbida, Kaliforniya bilan chegaraga yaqin hududda yirik tabiiy yongʻin tarqalmoqda.
Rino shahri meri Hillari Shivning CNN telekanaliga maʼlum qilishicha, tez tarqalayotgan yongʻin sabab 40 mingdan ortiq kishi oʻz uylarini tark etishga majbur boʻlgan.
Yana 45 ming nafar aholiga ehtimoliy evakuatsiyaga tayyor turish boʻyicha koʻrsatma berilgan.
Yongʻin 6 ming gektardan ortiq maydonni qamrab oldi
Hawk nomi berilgan yongʻin 22-avgust kuni boshlangan. Oradan bir sutka oʻtib, olov qamrab olgan maydon 6 ming gektardan oshgan.
Yongʻin Rino shahridan taxminan 8 kilometr masofada tarqalmoqda.
Kaliforniya chegarasi yaqinida joylashgan Rino shahrida 280 mingdan ortiq aholi istiqomat qiladi. U Las-Vegas aglomeratsiyasidan tashqaridagi Nevadaning eng yirik shahri hisoblanadi.
Olti kishi jabrlandi
OAV maʼlumotlariga koʻra, yongʻin oqibatida kamida olti kishi jabrlangan. Ular orasida uch nafar oʻt oʻchiruvchi ham bor.
Shuningdek, bir nechta turar joy binosi yonib ketgani xabar qilinmoqda.
Nevada gubernatori Jo Lombardo Rino maʼmuriy markazi hisoblangan Uosho okrugida favqulodda holat eʼlon qildi.
Uning taʼkidlashicha, olov tez surʼatlarda tarqalmoqda va turar joylarga ham xavf solyapti.
Vaziyat sabab Uosho okrugidagi maktablarda 24-avgust kuni darslar bekor qilingan.
Yongʻinga inson omili sabab boʻlgani aytilmoqda
Favqulodda xizmatlar dastlabki maʼlumotlarga tayanib, yongʻin kelib chiqishiga inson faoliyati sabab boʻlganini bildirgan. Biroq hozircha bu boʻyicha qoʻshimcha tafsilotlar ochiqlanmagan.
Yongʻin sabablarini aniqlash boʻyicha surishtiruv davom etmoqda.
Oʻt oʻchirish xizmati maʼlumotiga koʻra, hududdagi issiq va quruq ob-havo hamda kuchli shamol olovning tez tarqalishiga sharoit yaratmoqda. Asosan quruq oʻtlar va butalar yonmoqda.
