Bolani birinchi sinfga qanday joylashtiriladi?

Kimlar 1-sinfga qabul qilinadi?

«Ta’lim to‘g‘risida»gi Qonunga muvofiq, 1-sinfga o‘qish boshlanadigan yilda 7 yoshga to‘ladigan bolalar qabul qilinadi. 2026–2027 o‘quv yilida 2019 yil 31 dekabrgacha tug‘ilgan bolalar maktabga qabul qilinadi.

Qabul ikki bosqichda amalga oshiriladi:

• 20 iyun – 31 iyul. Maktab mikrohududida yashovchi ota-onalarning arizalari qabul qilinadi. Bunday maktabga qabul qilinish kafolatlanadi.
• 1 – 31 avgust. Boshqa mikrohududdagi maktablardagi bo‘sh o‘rinlarga ariza topshirish. Agar joy yo‘q bo‘lsa, qabul qilish kafolatlanmagan. Bola yashash manzili bo‘yicha biriktirilgan maktabga qabul qilinadi.

O‘ziga tegishli maktabni qanday aniqlash mumkin?

Har bir davlat maktabiga muayyan mikrohudud biriktirilgan. Maktabga qabul qilishda ushbu mikrohududda doimiy ro‘yxatdan o‘tgan bolalar ustuvor huquqqa ega.

O‘ziga tegishli maktabni uch xil usulda aniqlash mumkin: my.maktab.uz orqali, my.gov.uz «Bolani birinchi sinfga joylashtirish»  xizmati orqali va MMTV xaritasi orqali.  

my.gov.uz orqali ariza berish

Buning uchun OneID orqali ro‘yxatdan o‘tgan bo‘lish kerak.

1. my.gov.uz saytida avtorizatsiyadan o‘ting

Tizimga OneID orqali kirish mumkin. Avtorizatsiyadan o‘tmasdan ariza berish imkoni yo‘q.

my.gov.uz portaliga o‘ting va «Bolani maktabning birinchi sinfiga joylashtirishga ariza yuborish» xizmatini tanlang. So‘ngra «Ariza yuborish»ni tanlang.

2. Bola to‘g‘risidagi ma’lumotlarni ko‘rsating

Dastlab bolaga kim ekanligingizni tanlang: ota-ona yoki qonuniy vakil.

Agar bolaning ma’lumotlari bazada mavjud bo‘lsa, avtomatik chiqadi. Aks holda JShShIRni kiriting.

3. Arizani to‘ldiring

Majburiy maydonlarni to‘ldiring.

Quyidagilarni ko‘rsating:

• ta’lim tili;
• telefon raqami;
• arizachi harbiy xizmatchimi yoki yo‘qmi;
• tizim so‘ragan boshqa ma’lumotlar.

So‘ng «Keyingi»ni bosing.

4. Maktabni tanlang

So‘ngra bolaning doimiy yashash manzili ko‘rsatilgan sahifa ochiladi.

Quyidagilarni tanlang:

• viloyat;
• tuman yoki shahar;
• davlat maktabi.

Agar bola ro‘yxatdan o‘tish manzili bo‘yicha maktabga kiradigan bo‘lsa, kerakli maktab avtomatik ravishda ko‘rsatiladi.

5. Arizani yuboring va tekshiruvni kuting

Ariza yuborilishi bilan «Ko‘rib chiqilmoqda» maqomini oladi. Uni my.gov.uz saytidagi shaxsiy kabinetda tekshirish mumkin.

Ariza ko‘rib chiqilganidan so‘ng ko‘rsatilgan telefon raqamiga maktabga borish kuni va vaqtini tanlash taklif qilingan SMS keladi. 

6. Maktabga borish sanasini tanlang

SMS kelganidan so‘ng shaxsiy kabinetga kirib arizani oching.

Tizim quyidagilarni tanlashni taklif qiladi:

• maktabga borish kuni;
• qabul vaqti.

Sana va vaqtni tasdiqlang.

7. Maktabga boring

Tanlangan kunda farzandingiz bilan maktabga borasiz. Hujjatlarni rasmiylashtirish uchun ularning asl nusxasini yoningizda olib keling.

Hujjatlar tekshirilgandan keyin bola qabul qilingani haqida ma’lumot shaxsiy kabinetda aks etadi. Arizani ko‘rib chiqish muddati - 3 ish kuni.

MyMaktab orqali ariza berish

Shuningdek,  MyMaktab platformasi orqali ham ariza berish mumkin. Ariza yuborilganidan so‘ng uning holatini shaxsiy kabinetda kuzatish mumkin.

1.    MyMaktab saytida shaxsiy kabinetga kiring.

2.    «Arizalar» bo‘limini oching va «1-sinfga qabul» xizmatini tanlang.

3.    «Ariza yaratish» tugmasini bosing.

4.    Farzandingizni, o‘quv yilini, ta’lim tili va kvota toifasini tanlang, so‘ngra doimiy ro‘yxatdan o‘tish manzilini tekshiring.

5.    Arizani saqlang va ko‘rib chiqish uchun yuboring.

Ariza yuborilganidan so‘ng uning holatini shaxsiy kabinetda kuzatish mumkin.

Birinchi sinfga qabul uchun qanday hujjatlar kerak?

Portal farzand va ota-ona haqidagi ma’lumotlarni davlat reyestrlaridan avtomatik ravishda oladi. Ammo maktabga borganda hujjatlarning aslini taqdim etish lozim.

Farzandni birinchi sinfga berish uchun quyidagi hujjatlar taqdim etiladi:

• bolaning tug‘ilganlik haqidagi guvohnomasi;
• ota-ona yoki qonuniy vakilning pasporti yoki ID-kartasi;
• bolaning tibbiy kartasi (026-shakl);
• emlash kartasi (063-shakl);
• 3,5 × 4,5 sm o‘lchamdagi 4 dona foto (hujjatlar maktabda topshirilsa);
• arizani ota-ona topshirmasa - qonuniy vakil vakolatini tasdiqlovchi hujjat;
• agar imtiyoz mavjud bo‘lsa, uni tasdiqlovchi hujjatlar.

Hujjatlar tekshirilganidan so‘ng maktab bolaning qabul qilinganini tasdiqlaydi.

Maktabda nima bo‘ladi?

Aksariyat davlat maktablarida suhbat o‘tkazilmaydi: faqat hujjatlar tekshirilib, bola qabul qilinadi. Qabul komissiyasining bolaning bilimini tekshirishga haqqi yo‘q.

Ammo rus, ingliz yoki qoraqalpoq tilida ta’lim beriladigan maktab va sinflarda bolaning shu tildagi boshlang‘ich muloqot ko‘nikmalari tekshirilishi mumkin. Ko‘nikmani baholash uchun so‘rovnoma MMTV saytida e’lon qilinadi va 20 iyungacha maktab binosida ilib qo‘yiladi.

Agar bola muloqot ko‘nikmasiga ega bo‘lmasa, komissiya unga o‘zbek tilida ta’lim beriladigan sinfga yoki maktabga o‘tishni taklif qiladi. 

Agar rad etishsa nima qilish kerak?

Tartibga ko‘ra qabul komissiyasi faqat uchta holatda rad etish huquqiga ega:

1.    Arizada noto‘g‘ri ma’lumotlar bo‘lsa.

2.    Tibbiy xulosada bola oddiy umumta’lim maktabida o‘qiy olmasligi ko‘rsatilgan bo‘lsa.

3.    Tanlangan ta’lim tilida boshlang‘ich muloqot ko‘nikmalari bo‘lmasa.

To‘rtinchi asos esa - boshqa mikrohudud maktabida bo‘sh o‘rin qolmagan bo‘lsa.

Boshqa barcha sabablar noqonuniy hisoblanadi. «Bola tayyor emas», «o‘qishni bilmaydi», «suhbatdan o‘tmadi», «faqat o‘z mikrohududimizdagilarni qabul qilamiz» deya rad qilish mumkin emas. Arizadagi kamchiliklarni to‘g‘rilab, hujjatlarni qayta topshirish mumkin. Boshqa holatlarda rad etilganda MMTVga yoki ta’lim boshqarmasiga shikoyat qilish mumkin.

Xususiy maktabga qabul

Xususiy maktablar uchun yagona qabul tartibi mavjud emas. Qabul muddati, hujjatlar ro‘yxati, o‘qish narxi va kirish tartibini har bir maktab o‘zi belgilaydi.

Ularga my.gov.uz orqali ariza berib bo‘lmaydi. Qabul faqat maktab sayti, elektron shakl, Telegram-bot yoki maktabning o‘zida amalga oshiriladi.

Ariza berilganidan so‘ng maktab vakillari ota-ona bilan bog‘lanib, qabulning keyingi bosqichlari haqida ma’lumot beradi. Zarur bo‘lsa bolani suhbatdan yoki testdan o‘tkazadi.

Qanday hujjatlar kerak?

Aniq ro‘yxatni maktab belgilaydi, lekin ko‘pincha quyidagi hujjatlar so‘raladi:

• bolaning tug‘ilganlik to‘g‘risidagi guvohnomasi;
• ota yoki onaning ID-kartasi;
• bolaning fotosurati;
• tibbiy hujjatlar, agarda maktab qoidalarida ko‘zda tutilgan bo‘lsa.

Bolani boshqa maktabga o‘tkazish

Davlat maktablari o‘rtasida o‘quvchilarni boshqasiga ko‘chirish xizmati 2026 yil 31 iyulgacha to‘xtatilgan. Bu tizimning birinchi sinfga arizalarni qabul qilishga tayyorlash bilan bog‘liq.

Bolani boshqa maktabga o‘tkazish uchun arizalar 1 avgustdan qabul qilinadi. Qo‘shimcha ravishda shaxsiy hujjatlar to‘plami va o‘zlashtirish tabeli kerak bo‘ladi.

Test qanday o‘tadi?

Ko‘plab xususiy maktablar qabuldan oldin suhbat yoki test o‘tkazadi. Bolaning yoshidan kelib chiqib quyidagilar tekshirilishi mumkin:

• nutq rivojlanish;
• o‘qish ko‘nikmasi;
• sanash ko‘nikmasi;
• xotira va diqqat qaratish;
• mantiqiy fikrlash.

Agar maktab bola dasturni o‘zlashtirishga qiynaladi deb hisoblasa, tayyorlov sinfini taklif etishi mumkin.

Yodda saqlash muhim

• Davlat maktabiga ariza my.gov.uz yoki MyMaktab orqali beriladi.
• 2026 yilda 2019 yil 31 dekabrdan kechikmay tug‘ilgan bolalar qabul qilinadi.
• Arizalar 20 iyundan 31 avgustgacha qabul qilinadi.
• Davlat maktabi bolaning doimiy ro‘yxat manzili bo‘yicha belgilanadi.
• Ariza yuborilgandan keyin SMS xabarni kutish va maktabga borish sanasini tanlash kerak.
• Maktabga borganda hujjatlarning asl nusxalarini olib borish zarur.
• Ayrim rus tilidagi maktablarda suhbat o‘tkazilishi mumkin.
• Xususiy maktablarga hujjatlar to‘g‘ridan-to‘g‘ri maktabning o‘ziga topshiriladi.