Экология ва иқлим ўзгариши миллий қўмитаси ҳузуридаги Давлат экологик назорат инспекцияси — Экополиция ходимлари 19 майдан 22 июлга қадар Тошкент шаҳри ва Тошкент вилоятида назорат рейдларини ўтказди.
Рейдларда асосий эътибор қурилиш чиқиндиларини белгиланмаган жойларга ноқонуний ташиш ва дарахтларни ноқонуний кесиш ҳолатларини аниқлашга қаратилди.
Назорат тадбирлари Тошкент вилоятининг Юқори Чирчиқ, Қуйи Чирчиқ, Зангиота ва Қибрай туманлари, шунингдек, пойтахтнинг Янгиҳаёт, Юнусобод ва Сергели туманларида ўтказилди.
Текширувлар давомида фуқаролар қурилиш чиқиндиларини транспорт воситаларида белгиланмаган жойларга олиб бориб ташлагани аниқланган.
Рейдлар якунларига кўра, ҳуқуқбузарларга нисбатан 48 та маъмурий баённома расмийлаштирилиб, жами 316,3 млн сўм жарима белгиланди.
Шунингдек, бир йил ичида чиқиндиларни ноқонуний ташлаш билан боғлиқ ҳуқуқбузарликни такроран содир этган ҳайдовчи ҳам аниқланган. Ушбу ҳолат бўйича ҳужжатлар ҳуқуқни муҳофаза қилувчи органларга юбориш учун тайёрланмоқда.
Экополиция томонидан бундай рейд тадбирлари республиканинг барча ҳудудларида давом эттирилмоқда.
