Qori-Niyoziy va Niyozbek yo‘li ko‘chalari chorrahasida 26 iyul soat 08:00 dan 28 iyul soat 18:00 gacha transport harakati qisman cheklanadi.
Bu haqda Mirzo Ulug‘bek tumani hokimligi matbuot xizmati ma’lum qildi.
Qayd etilishicha, 2026–2027 yillar kuz-qish mavsumiga tayyorgarlik dasturi doirasida Qori-Niyoziy ko‘chasidagi issiqlik kameralarini bog‘lovchi issiqlik tarmoqlari almashtirilmoqda.
“Mazkur hududdagi amaldagi issiqlik quvurlari yer ostida taxminan 8 metr chuqurlikda joylashgani sababli, yangi issiqlik tarmoqlari loyihaga muvofiq ularning ustki qatlamidan yotqizilmoqda”, deyiladi xabarda.
Tuman hokimligining bildirishicha, qurilish-montaj ishlarini qisqa muddatda va sifatli yakunlash maqsadida ishlar ikki smenada uzluksiz olib boriladi, haydovchilar uchun aylanma yo‘llar va tegishli yo‘l belgilari o‘rnatiladi.
Quvurlar yotqizilgach, yo‘l qoplamasi tezkor ravishda tiklanib, transport harakati to‘liq qayta yo‘lga qo‘yilishi aytilmoqda.
