28 iyul kuni Yaponiya janubi-g‘arbida 7,1 magnitudali zilzila ro‘y berdi. Yaponiya meteorologiya agentligiga ko‘ra, zilzila o‘chog‘i Kumamoto prefekturasida, 10 kilometr chuqurlikda joylashgan.
Meteorologiya agentligi Ariake va Yatsusiro ko‘rfazlarida tsunami ro‘y berishi xavfi haqida e’lon qilgandi, ko‘p o‘tmay bu ogohlantirish bekor qilindi.
150 mingdan ortiq kishiga evakuatsiya punktlariga ko‘chib o‘tish bo‘yicha ko‘rsatma berildi.
Reuters agentligi Kumamotodagi shifoxonalardan biriga tayanib, kamida 50 kishi jabrlangani haqida xabar qilgan.
Nikkei nashriga ko‘ra, zilzila vaqtida tezyurar poyezd ichida bo‘lgan yo‘lovchilardan ham bir nechasi jarohat olgan.
Yaponiya bosh vaziri Sanae Takaichi Tokiodagi matbuot anjumanida jabrlanganlar soni va yetkazilgan zarar miqdori hali aniq emasligini aytdi. «Ayrim hududlarda elektr ta’minotida uzilishlar va yong‘inlar ro‘y bergan, shuningdek, yo‘llar va ko‘priklar shikastlangan, binolar qulagan», – degan bosh vazir.
Mahalliy nashrlarga ko‘ra, ko‘plab yirik trassalarda ulkan yoriqlar yuzaga kelgan. Kumamotoda temiryo‘l qatnovi to‘xtatilgan, mahalliy aeroport reyslarni qabul qilmayapti va yangi parvozlarni amalga oshirmayapti.
Kumamoto prefekturasidagi Aeon Mall nomli savdo markazida davomli silkinishlardan keyin portlash ro‘y berib, binoning bir qismi shikastlangan. Kompaniya vakili ma’lum qilishicha, birinchi silkinishdan keyin mijozlar va xodimlar evakuatsiya qilingan, lekin bir necha kishi ichkarida qamalib qolgan.
OAV ushbu savdo markazidagi portlash oqibatida bir necha kishi halok bo‘lganini yozgan.
Yaponiya – dunyoda zilzilalar eng ko‘p kuzatiladigan mamlakatlardan biridir: bu yerda yiliga 1 500 marta atrofida yerosti silkinishlari ro‘y beradi.
O‘n yil muqaddam Kumamoto prefekturasi davomli zilzilalar makoniga aylangan, xususan, 2016 yil aprelida 7 magnitudali zilzila ro‘y bergandi. O‘shanda NHK telekompaniyasi tabiiy ofat oqibatida 278 kishi halok bo‘lganini xabar qilgan.
