2026 yil yanvar oyidagi Statista ma’lumotlari asosida tuzilgan reytingda jahon kinosi tarixida eng ko‘p daromad keltirgan 20 nafar rejissyorning umumiy kassa yig‘imlari hisoblab chiqilgan. Hisob-kitobga 2026 yilda prokatga chiqqan va hali namoyishi yakunlanmagan filmlar kiritilmagan.
Reyting yetakchisi Stiven Spilberg bo‘lib, u faoliyati davomida suratga olgan 37 ta badiiy film jahon prokatida 10,7 milliard dollardan ortiq daromad keltirgan. Uning eng muvaffaqiyatli filmi «Yura davri bog‘i» (Jurassic Park) bo‘lib, ushbu kartina bir milliard dollardan ziyod kassa yig‘imini to‘plagan.
Spilbergning mashhur asarlari qatoriga «Jag‘lar», «O‘zga sayyoralik», «Oddiy askar Rayanni qutqarish» hamda yetti marta «Oskar» mukofotiga sazovor bo‘lgan «Shindler ro‘yxati» kiradi.
Ikkinchi o‘rinni filmlari 9,8 milliard dollar daromad keltirgan Jyeyms Kemeron egalladi. Uning «Titanik», «Avatar», «Terminator» va «O‘zga» kabi filmlari jahon kinosida eng mashhur loyihalardan sanaladi. Ayniqsa, «Avatar» franshizasi Kemeronning asosiy muvaffaqiyatiga aylangan.
Reytingda shuningdek, Marvel filmlari bilan tanilgan Entoni va Jo Russo, «Uzuklar hukmdori» va «Xobbit» trilogiyalari muallifi Piter Jyekson, «Transformerlar» franshizasi rejissyori Maykl Bey ham yuqori o‘rinlarni egallagan.
Taniqli rejissyor Kristofer Nolan ham eng ko‘p daromad keltirgan kinomualliflar qatoridan joy olgan. Uning filmlari jami 6,1 milliard dollardan ortiq kassa yig‘imini to‘plagan. Nolanning eng katta tijoriy muvaffaqiyati esa Betmen haqidagi trilogiyaning yakuniy qismi - «Qora ritsar: Afsonaning yuksalishi» filmi bo‘lgan.
Mutaxassislar ta’kidlashicha, reytingdagi rejissyorlarning aksariyati eng katta moliyaviy muvaffaqiyatga yirik kinofranshizalar yoki mashhur asarlar ekranlashtiruvi orqali erishgan.
