Madaniyat vazirining birinchi o‘rinbosari - Kinematografiya agentligi direktori Jahongir Ahmedov «O‘zbekfilm» og‘ir moliyaviy ahvolga tushib qolganini ma’lum qildi.
«Hozir hal qilinishi kerak bo‘lgan eng muhim masala – «O‘zbekfilm»ni asrash va uni garovdan xalos qilish. Bugun «O‘zbekfilm»ning 22,9 million yevro miqdorida kredit majburiyati borligini bilarmidingiz? Studiyaning mol-mulki, jumladan, yer maydonlari ham ushbu kredit uchun garovga qo‘yilgan. Bu hali hammasi emas. Soliqlardan qariyb 1 milliard so‘mlikdan ortiq qarzdorlik to‘plangani sababli, kinostudiya balansidagi 12 ta avtomashina 12 kun ichida auksionga qo‘yilishi xavfi bor. Xodimlarning ish haqlari bo‘yicha ham yirik qarzdorliklar shakllangan», deya yozdi u o‘zining Telegram kanalida.
Ahmedovning qo‘shimcha qilishicha, kinostudiya bir yilda kamida 60 milliard so‘mlik buyurtma bajarmasa, o‘zini saqlab turolmaydi. Ya’ni u amalda davlat buyurtmasiga qaram bo‘lib qolgan. Biznes modeli yo‘q. Bozor mexanizmiga to‘liq o‘tilmagan.
«Bu raqamlar ortida bir asrlik o‘zbek kinosi tarixi, uning obro‘si va taqdiri turibdi. «O‘zbekfilm»da ne-ne buyuk rejissyorlar, aktyorlar, operatorlar, rassomlar va kino mutaxassislari o‘z yo‘lini boshlagan. Xalqimiz bugun ham sevib tomosha qiladigan ko‘plab filmlar shu yerda yaratilgan. Shuning uchun bugungi vazifa – studiyani shunchaki saqlab qolish emas. Uni tubdan isloh qilish kerak», deydi Kinematografiya agentligi direktori.
Ma’lumot uchun, Kinematografiya agentligiga 2019-2024 yillarda Firdavs Abduxoliqov, 2024-2026 yillarda Shuhrat Rizayev rahbarlik qilgan.
