Qarorga muvofiq, 2026 yil 1 noyabrdan boshlab mahalliy ishlab chiqaruvchilarning ko‘mir mahsulotlari birja savdolari orqali sotiladi. Aholi va byudjyet tashkilotlariga yetkazib beriladigan mahalliy ko‘mir uchun yagona tarif joriy etiladi.
Shuningdek, «Ko‘mir ta’minoti» MChJ tomonidan interaktiv portal ishga tushirilib, aholi ushbu tizim orqali buyurtma berishi, ko‘mirning sifati va narxi bo‘yicha takliflarni taqqoslashi hamda yetkazib berish jarayonini kuzatishi mumkin bo‘ladi. Portalda tadbirkorlarning reytingi ham shakllantiriladi.
Ijtimoiy reyestrga kiritilgan oilalar uchun ko‘mir xarid qilish xarajatlarining bir qismi moddiy yordam sifatida qoplab beriladi. Buning uchun har bir tonna ko‘mir uchun belgilangan me’yorlar asosida mablag‘ ajratiladi.
Hujjatda mahalliy ko‘mir ishlab chiqarishni ko‘paytirish, omborlar infratuzilmasini modernizatsiya qilish, import ko‘mir hisobini raqamlashtirish hamda aholi va byudjyet tashkilotlarini kuz-qish mavsumida uzluksiz ko‘mir bilan ta’minlash bo‘yicha qator qo‘shimcha chora-tadbirlar ham belgilangan.
