O‘tgan kun davomida jahonda ro‘y bergan eng asosiy voqea va yangiliklar sharhi bilan kundalik xabarnomada tanishtiramiz.
Ho‘rmuz bo‘yicha kelishuv
Eron va O‘mon o‘rtasidagi taklif etilayotgan kelishuv Tehronga Ho‘rmuzdan o‘tuvchi kemalar ustidan nazoratni beradi. Bu haqda chorshanba kuni Erondagi yuqori martabali manba va mintaqaviy rasmiylardan ikkisi Reuters’ga ma’lum qildi. Bu Eron uchun shu paytgacha qilingan eng katta yon bosishlardan biri ekani aytilmoqda.
Eron rasmiysiga ko‘ra, bo‘g‘ozga kirish hamda chiqish qatnovlari Eron hududiy suvlari orqali o‘tadi. Boshqa bir mintaqaviy manbaning ta’kidlashicha, «nazorat» qanday belgilanishi bo‘yicha tafsilotlar hali aniqlanishi kerak.
Eron bo‘g‘ozdan foydalanayotgan kemalardan yuk narxining 5 foizdan 7 foizgacha miqdorida boj undirishni talab qilmoqda. O‘mon taxminan 3 foiz atrofidagi to‘lovlarni muhokama qilmoqda, Vashington esa umuman to‘lov bo‘lmasligini xohlaydi. Ko‘rfaz muzokarachilari esa har qanday yig‘imlar ixtiyoriy bo‘lishini talab qilmoqda.
Shu bilan birga Eron AQShning har qanday yangi hujumi kuchli javob zarbasini keltirib chiqarishi haqida ogohlantirgan.
«Eronning ogohlantirishi qat’iy edi: agar Amerika Eronning infratuzilmasini nishonga olsa, ular Ko‘rfaz energiya ob’yektlari va boshqa mintaqaviy nishonlarga zarba berish orqali javob qaytaradi», dedi Ko‘rfazdagi manbalardan biri.
AQSh tomoni hozircha Ho‘rmuz bo‘yicha taklifga izoh bermadi. Prezident Donald Tramp bo‘g‘ozni qayta ochish bo‘yicha kelishuv yaqinlashib qolganini aytgandi. Garchi AQSh rasmiylari Ho‘rmuzga kirishni Eron nazorat qilishiga hech qachon rozi bo‘lmasligini aytgan bo‘lsa ham.
Eronga bunday vakolatini beruvchi kelishuv AQSh va Isroil tomonidan fevral oyida boshlangan urush – mintaqaviy kuchlar muvozanatining Tehron foydasiga jiddiy o‘zgarganini anglatadi. Urushdan oldin bo‘g‘oz barcha kemalar uchun to‘lovlarsiz, erkin va ochiq edi.
Germaniya aeroportida portlovchi qurilma
Kecha tunda Germaniyadagi aeroportda portlovchi qurilma o‘rnatilgan dron topildi. Saksoniya politsiyasiga ko‘ra, portlovchi modda ortilgan ob’yekt to‘xtab turgan «Antonov» samolyotlari yaqinida ko‘rib qolingan. Portlovchi qurilmaning detonatori robot yordamida olib tashlangan. Keyinroq politsiya nazorat ostidagi portlashni amalga oshirgan.
