Prezident Shavkat Mirziyoyevga chorvachilik va parrandachilik tarmoqlarini rivojlantirish, go‘sht va sut mahsulotlari ishlab chiqarishni ko‘paytirish hamda sohaga zamonaviy texnologiyalarni joriy etish bo‘yicha ishlab chiqilgan chora-tadbirlar taqdim etildi.
Taqdimotda mamlakatda chorvachilik mahsulotlari ishlab chiqarishni ko‘paytirish maqsadida xorijdan naslli chorva mollarini olib kelish rejalari ham ko‘rib chiqildi.
Rejaga muvofiq, Mo‘g‘ulistondan 150 ming bosh qo‘y, Xitoy va Yevropa davlatlaridan 100 ming bosh naslli qoramol, shuningdek, Belarusdan 2 ming bosh naslli mol import qilinishi ko‘zda tutilgan.
Qayd etilishicha, mazkur choralar hisobiga mamlakatda yiliga qo‘shimcha 44 ming tonna go‘sht ishlab chiqarish imkoniyati yaratiladi.
Umuman, 2026–2028-yillarda chorvachilik tarmog‘ini rivojlantirish uchun 463 million dollar mablag‘ yo‘naltirish rejalashtirilgan. Shuningdek, faoliyati to‘xtab qolgan chorvachilik korxonalarini tiklash, aholi xonadonlarida yengil konstruksiyali molxonalar qurish, naslchilik ishlarini rivojlantirish va Smart Fermer raqamli platformasini joriy etish orqali tarmoq samaradorligini oshirish choralari belgilandi.
Davlat rahbari loyihalarning iqtisodiy samaradorligini chuqur tahlil qilish, mablag‘larni manzilli yo‘naltirish, raqamli monitoring tizimini yo‘lga qo‘yish hamda ichki bozorni sifatli va hamyonbop go‘sht-sut mahsulotlari bilan barqaror ta’minlash yuzasidan mutasaddilarga topshiriqlar berdi.
