Yo‘l harakatini tashkil etish markazi ma’lumotiga ko‘ra, piyodalar xavfsizligini oshirish maqsadida Amir Temur xiyoboni atrofi va unga tutash chorrahalarda avvalroq 5 ta yangi svetofor ob’yekti o‘rnatilgan edi.
Endilikda ularning barchasi o‘zaro sinxronlashtirilib, ikki yo‘nalishda «Yashil to‘lqin» rejimida ishlamoqda.
Birinchi yo‘nalishda Amir Temur va Buxoro ko‘chalari kesishmasida svetoforning yashil signalida harakatni boshlagan avtomobil Amir Temur xiyoboni atrofidagi aylanma chorrahadan o‘tib, Oloy bozori tomon svetoforlarda ortiqcha to‘xtamasdan harakatlanishi mumkin.
Qarama-qarshi yo‘nalishda esa Temuriylar tarixi davlat muzeyi tomonidan Amir Temur ko‘chasi bo‘ylab kelayotgan avtomobillar aylanma chorrahadan o‘tib, Amir Temur va Buxoro ko‘chalari kesishmasigacha «Yashil to‘lqin» rejimida harakatlanishi mumkin.
«Yashil to‘lqin» barcha svetoforlarda yashil chiroq bir vaqtda yonishini anglatmaydi. Tizim avtomobilning muayyan yo‘l qismini bosib o‘tishi uchun zarur vaqtni hisobga oladi va keyingi svetoforlarda yashil signal shunga muvofiq vaqt oralig‘i bilan yonadi.
Shu bois haydovchi yo‘nalishga yashil signalda kirib, belgilangan tezlik me’yorida bir maromda harakatlansa va yo‘lda transport oqimi erkin bo‘lsa, keyingi svetoforlarga ham yashil signal vaqtida yetib borishi mumkin.
Markaz «Yashil to‘lqin» tizimi tezlikni oshirish uchun emas, balki transportning yagona va xavfsiz ritmda harakatlanishi uchun joriy etilganini ta’kidladi. Haydovchilardan tezlik me’yoriga rioya qilish, keskin tezlashish va tormozlashdan saqlanish, xavfsiz oraliq masofani saqlash hamda piyodalarga yo‘l berish so‘ralgan.
Yangi tizim orqali svetoforlar oldidagi ortiqcha to‘xtashlarni kamaytirish, transport oqimini bir maromga solish, chorrahalardagi navbatlar va kutish vaqtini qisqartirish kutilmoqda. Shuningdek, keskin tezlashish va tormozlashlar kamayishi hisobiga yonilg‘i sarfi va zararli chiqindilar hajmini qisqartirish maqsad qilingan.
Keyingi bosqichda Amir Temur xiyobonidagi aylanma chorrahadan Maxtumquli ko‘chasigacha bo‘lgan yo‘nalishni ham «Yashil to‘lqin» tizimiga ulash rejalashtirilgan. Hozirda mazkur uchastka uchun tegishli algoritm ishlab chiqilmoqda.
